వివేక్‌ రామస్వామితో డిన్నర్‌ అవకాశం

ఒక్కొక్కరికి 50 వేల డాలర్ల పైమాటే

వాషింగ్టన్‌: రిపబ్లికన్‌ పార్టీ తరఫున అమెరికా అధ్యక్ష అభ్యర్థిత్వ రేసులో నిలిచిన వివేక్‌ రామస్వామి ఎన్నికల ప్రచారానికి నిధుల సేకరణ నిమిత్తం పలువురు సిలికాన్‌ వ్యాలీ వ్యాపారవేత్తలు ఓ ప్రత్యేక కార్యక్రమంతో ముందుకొచ్చారు. వివేక్‌ ప్రత్యేక అతిథిగా ఈ నెల 29న ఓ విందుకు ఏర్పాట్లు చేశారు. ఈ కార్యక్రమంలో పాల్గొనాలనుకునే వారు 50 వేల డాలర్లు (సుమారు రూ.41 లక్షలు) ఆపైనే చెల్లించాల్సి ఉంటుందట. శాన్‌ ఫ్రాన్సిస్కోలోని సోషల్‌ క్యాపిటల్‌ సంస్థ సీఈవో చామాత్‌ పలిహపిటియా నివాసంలో ఈ విందు నిర్వహించనున్నారు. 10 లక్షల డాలర్ల సేకరణే లక్ష్యంగా ఈ కార్యక్రమం నిర్వహిస్తున్నట్లు వార్తలొస్తున్నాయి.