రైలు ప్రమాదాన్ని నిలువరించిన బాలుడికి పురస్కారం

దిల్లీ: భారీ వర్షాలకు రైలుపట్టాల కింద మట్టి, రాళ్లు కొట్టుకుపోయిన తరుణంలో అదే మార్గంలో వస్తున్న ప్రయాణికుల రైలును గుర్తించి ప్రమాదాన్ని నివారించడంలో దోహదపడిన 12 ఏళ్ల బాలుడికి రైల్వేశాఖ పురస్కారపత్రం, నగదు బహుమతి అందజేసింది. పశ్చిమబెంగాల్‌లోని భలూకా రోడ్‌ యార్డుకు చేరువగా గత గురువారం ఈ ఘటన చోటు చేసుకున్న విషయం తెలిసిందే. సమీప గ్రామానికి చెందిన ముర్సలిన్‌ షేక్‌ తాను ధరించిన ఎర్రషర్టుని ఊపుతూ రైలు లోకోపైలట్‌ను అప్రమత్తం చేయడంతో ఆయన ఆకస్మిక బ్రేకు వేసి.. ప్రమాదం జరగబోయిన స్థలానికి ముందే రైలును ఆపగలిగారు. రైలుమార్గం సరిగా లేదని గుర్తించిన క్షణాల్లోనే స్పందించిన ముర్సలిన్‌ను అభినందించడానికి ఉత్తర మాల్డా ఎంపీ ఖగెన్‌ ముర్ము, కతిహార్‌ డీఆర్‌ఎం సురేంద్రకుమార్‌ సోమవారం ఆ బాలుడి ఇంటికి వెళ్లారు. చిన్న వయసులోనే స్పందించే గుణం ఉండడాన్ని కొనియాడారు.