హఠాత్తుగా ఆగిన లాంబర్‌జాక్‌.. గాల్లో వేలాడిన సందర్శకులు

ఆంటారియో: పిల్లలు, స్నేహితులతో సరదాగా పార్కు వెళ్లిన సందర్శకులకు చేదు అనుభవం ఎదురైంది. వారు ఎక్కిన ‘లాంబర్‌జాక్‌ రైడ్‌’ ఆకస్మికంగా ఆగిపోవడంతో వారంతా గాల్లో తలకిందులుగా వేలాడారు. ఈ ఘటన కెనడాలో చోటు చేసుకుంది. ఒంటారియోలోని ‘వండర్‌ల్యాండ్‌’ అమ్యూజ్‌మెంట్‌ పార్క్‌లో కొందరు సందర్శకులు లాంబర్‌జాక్‌ రైడ్‌ ఎక్కారు. పైకి వెళ్లిన కాసేపటికి అది హఠాత్తుగా ఆగిపోయింది. అందులో చిక్కుకుపోయిన వారంతా దాదాపు 30 నిమిషాలపాటు గాల్లో తలకిందులుగా వేలాడారు. భయాందోళనకు గురై కాపాడండి అంటూ కేకలు వేశారు. దానిలో చిక్కుకుపోయిన కొంతమంది తీవ్ర అస్వస్థతకు గురయ్యారు. దీనికి సంబంధించిన వీడియో ప్రస్తుతం సోషల్‌ మీడియాలో వైరల్‌గా మారింది. ‘‘రైడ్‌లో భాగంగా సందర్శకులు ఎక్కిన లాంబర్‌జాక్‌ పైకి వెళ్లాక ఆకస్మికంగా ఆగిపోయింది. కాసేటికి సందర్శకులను సురక్షితంగా కిందకు దించాం. శనివారం రాత్రి 11 గంటలకు ఈ ఘటన జరిగింది’’ అని పార్క్‌ యాజమాన్యం ఓ ప్రకటనలో వెల్లడించింది. ప్రమాదకర ఘటన చోటు చేసుకోవడంతో పార్క్‌ను కొన్ని రోజుల పాటు మూసి వేసినట్లు తెలుస్తోంది.