ల్యాండింగ్‌కు ముందు కుదుపులకు గురైన విమానం.. గాయపడిన ప్రయాణికులు

ఫ్లోరిడా: ల్యాండ్‌ అయ్యేందుకు కొన్ని నిమిషాల ముందు ఓ విమానం భారీ కుదుపులకు లోనైంది. దీంతో కొందరు ప్రయాణికులతో పాటు ఓ సిబ్బంది గాయపడ్డాడు. ఈ ఘటన జెట్‌బ్లూ సంస్థకు చెందిన విమానంలో చోటు చేసుకుంది. స్థానిక మీడియా కథనాల ప్రకారం.. ఈక్వెడార్‌ నుంచి అమెరికా ఫ్లోరిడాలోని ఫోర్ట్‌ లాడర్‌డేల్‌కు బయలుదేరిన విమానం ఈ ప్రమాదానికి గురైంది. ల్యాండింగ్‌ కొన్ని నిమిషాల ముందు భారీ కుదుపులకు గురైంది. ఈ ప్రమాదంలో ఏడుగురు ప్రయాణికులతో సహా ఒక సిబ్బంది గాయపడ్డారు. విమానాన్ని కంట్రోల్‌ చేసిన పైలట్‌ సురక్షితంగా ల్యాండింగ్‌ చేశారు. అనంతరం గాయపడిన వారిని స్థానిక ఆసుపత్రికి తరలించారు. బాధితులు కోలుకునేందుకు తమ సహకారం అందిస్తామని జెట్‌బ్లూ అధికారులు తెలిపారు.