టోరీల నిర్ణయాలే కొంపముంచాయా?

బ్రిటన్‌ సార్వత్రిక ఎన్నికల్లో కన్సర్వేటివ్‌ పార్టీ ఓటమికి పూర్తి బాధ్యత తనదేనని రిషి సునాక్‌ పేర్కొన్నప్పటికీ అంతకుముందు అధికారం వెలగబెట్టిన టోరీల నిర్ణయాలే ఈ దుస్థితికి కారణమనే అభిప్రాయం వ్యక్తమవుతోంది.

Published : 06 Jul 2024 04:11 IST

కన్సర్వేటివ్‌ పార్టీపై ప్రజల నిరాశక్తత కూడా..
బాధితుడిగా మిగిలిన సునాక్‌!

లండన్‌: బ్రిటన్‌ సార్వత్రిక ఎన్నికల్లో కన్సర్వేటివ్‌ పార్టీ ఓటమికి పూర్తి బాధ్యత తనదేనని రిషి సునాక్‌ పేర్కొన్నప్పటికీ అంతకుముందు అధికారం వెలగబెట్టిన టోరీల నిర్ణయాలే ఈ దుస్థితికి కారణమనే అభిప్రాయం వ్యక్తమవుతోంది. ఈ నేపథ్యంలో అధికార పార్టీ ఓటమికి గల పలు కారణాలను పరిశీలిస్తే..

  • అంతర్జాతీయ మీడియా కథనాల ప్రకారం.. కన్సర్వేటివ్‌ పార్టీ ఓటమికి ప్రధాన కారణం ఆ పార్టీపై ఓటర్లలో నెలకొన్న నిరాసక్తత. బ్రిటన్‌లో రెండు ప్రధాన పార్టీల మధ్య 10 నుంచి 15 ఏళ్లకు ఓసారి పరస్పర అధికార మార్పిడి జరిగే తీరు కనిపిస్తోంది. టోరీలు (కన్సర్వేటివ్‌) 1979 నుంచి 1997 వరకు అధికారంలో ఉండగా, లేబర్‌ పార్టీ 1997 నుంచి 2010 వరకు ఉంది. ఆ తర్వాత మళ్లీ టోరీలు అధికారం చేపట్టారు.
  • టోరీలు తీసుకున్న పలు నిర్ణయాలతో ఆర్థిక వ్యవస్థ మందగించిందనే వాదన ఉంది. పన్నుల వ్యవహారం, రికార్డు స్థాయిలో వలసలు వంటి అంశాలు అధికార పార్టీకి గడ్డుగా పరిణమించాయి. ఈ పరిస్థితి నిగెల్‌ ఫరేజ్‌ సారథ్యంలో రిఫార్మ్‌ యూకే వంటి కొత్త పార్టీ పుట్టుకు రావడానికి దారి తీసింది. అంతేకాకుండా ఆ పార్టీ తాజా ఎన్నికల్లో దాదాపు 15శాతం ఓట్లు పొందడం గమనార్హం. నిగేల్‌ తొలిసారి విజయం సాధించడంతో పాటు నాలుగు స్థానాల్లో ఆ పార్టీ గెలుపొందింది. ఇది కన్సర్వేటివ్‌ విజయావకాశాలకు గండికొట్టింది.
  • ఏళ్ల తరబడి కొనసాగిస్తున్న పొదుపు చర్యలు, బ్రెగ్జిట్‌తో మందగించిన ఆర్థిక వ్యవస్థ, జీవన వ్యయం భారీగా పెరిగిపోవడం, వరుస కుంభకోణాలు వంటివి అధికార పార్టీపై ఓటర్లలో విశ్వాసాన్ని సన్నగిల్లేలా చేశాయి.
  • ముఖ్యంగా కొవిడ్‌ లాక్‌డౌన్‌ సమయంలో ప్రధానిగా ఉన్న బోరిస్‌ జాన్సన్‌ పార్టీలు చేసుకున్న వ్యవహారం వెలుగు చూడటం, ఆ తర్వాత పాలనా పగ్గాలు చేపట్టిన లిజ్‌ ట్రస్‌ నిర్ణయాలతో మార్కెట్‌ కుదేలవడం వంటివి పార్టీ స్థాయిని మరింత దిగజార్చాయి.
  • ఎన్నికల ప్రచార సమయంలోనే పార్టీ సహచరుల బెట్టింగ్‌ కుంభకోణం వెలుగు చూడటం కూడా సునాక్‌ ప్రభుత్వంపై విమర్శలకు కారణమైంది.
  • ముందస్తు ఎన్నికలకు వెళ్లాలని సునాక్‌ తీసుకున్న నిర్ణయంపై సొంత పార్టీ నేతలే ఆశ్చర్యపడినప్పటికీ.. బోరిస్, లిజ్‌ ట్రస్‌ల తీరుతోనే పార్టీ పతనమైందని సొంత పార్టీ నేతలే వాదిస్తున్నారు. ఇందులో సునాక్‌ పాత్ర ఏమీ లేదని, కేవలం ఆయన బాధితుడు మాత్రమేనని చెబుతున్నారు.
  • పార్టీని గట్టెక్కించేందుకు రిషి సునాక్‌ ప్రయత్నాలు చేసినప్పటికీ.. ప్రజలతో మమేకమయ్యేందుకు తీవ్రంగా శ్రమించాల్సి వచ్చింది. ఓ సంపన్నుడికి సాధారణ పౌరుల ఇబ్బందులు ఎలా తెలుస్తాయనే విమర్శలు కూడా ఆయన ఎదుర్కొన్నారు.
  • జీవన వ్యయ సంక్షోభాన్ని పరిష్కరిస్తానని, మౌలిక సదుపాయాలకు ప్రాధాన్యం ఇస్తామని చెప్పడంతో పాటు సమర్థ, నైతిక పాలన అందిస్తామనే హామీలతో స్టార్మర్‌ సారథ్యంలోని లేబర్‌ పార్టీ ఓ ప్రత్యామ్నాయ శక్తిగా ఎదగడం తాజా ఎన్నికల్లో ఘన విజయానికి దోహదం చేసినట్లు అంచనా.
Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని