Corona Virus: పది రోజులు గడిచినా కొందరిలో ‘దశ’ మారదు

క్రియాశీలకంగానే కరోనా వైరస్‌

లండన్‌: కొవిడ్‌-19 సోకి, 10 రోజుల క్వారంటైన్‌ కాలం పూర్తి చేసుకున్న తర్వాత కూడా కొందరి నుంచి ఆ వ్యాధి వ్యాప్తి చెందే ప్రమాదం ఉందని బ్రిటన్‌ శాస్త్రవేత్తలు తేల్చారు. ఇలాంటివారిలో క్రియాశీలక వైరస్‌ జాడను పట్టుకొనేందుకు సరికొత్త పరీక్షను ఉపయోగించారు.

ఎక్సెటర్‌ విశ్వవిద్యాలయ శాస్త్రవేత్తలు ఈ పరిశోధన చేశారు. వీరు.. ప్రామాణిక పీసీఆర్‌ పరీక్షల్లో పాజిటివ్‌గా తేలిన 176 మంది నుంచి నమూనాలను సేకరించారు. వాటిపై కొత్త పరీక్షను ప్రయోగించారు. 13% మందిలో 10 రోజుల తర్వాత కూడా గణనీయ స్థాయిలో క్రియాశీలక వైరస్‌ ఆనవాళ్లు కనిపించాయి. కొందరిలో 68 రోజుల వరకూ ఇదే పరిస్థితి కొనసాగినట్లు శాస్త్రవేత్తలు తెలిపారు. ‘‘ఇది ఒకింత చిన్న అధ్యయనమే. అయితే 10 రోజుల తర్వాత కూడా కొందరిలో క్రియాశీలక వైరస్‌ ఉండొచ్చని, దీనివల్ల వ్యాధి వ్యాప్తి చెందొచ్చని ఇది స్పష్టం చేస్తోంది. నిర్దిష్టంగా ఎవరిలో ఈ పరిస్థితి ఉత్పన్నం కావొచ్చన్నది ఊహించడం కష్టం’’ అని పరిశోధనను పర్యవేక్షించిన ప్రొఫెసర్‌ లోర్నా హారిస్‌ పేర్కొన్నారు.

వైరస్‌లోని భాగాల ఉనికిని పట్టుకోవడం ద్వారా సంప్రదాయ పీసీఆర్‌ పరీక్షలు పనిచేస్తాయి. ఒక వ్యక్తికి ఇటీవల వైరస్‌ సోకిందా అన్నది ఇవి చెప్పగలవు. అయితే ఆ వైరస్‌ ఇంకా క్రియాశీలకంగా ఉందా అన్నది ఇవి తేల్చలేవు. తాజాగా బ్రిటన్‌ శాస్త్రవేత్తలు ఉపయోగించిన పరీక్ష మాత్రం ఒక వ్యక్తిలో వైరస్‌ క్రియాశీలకంగా ఉండి, ఇతరులకు వ్యాప్తి చెందేలా ఉంటేనే ‘పాజిటివ్‌’ ఫలితాన్ని ఇస్తుంది.