జీవన్మృతుడికి పంది మూత్రపిండాలు

అమర్చి పరీక్షించిన అమెరికా పరిశోధకులు

న్యూయార్క్‌: మానవుల ప్రాణాలను కాపాడేందుకు జంతువుల అవయవాలను ఉపయోగించే దిశగా చేస్తున్న ప్రయోగాల్లో పరిశోధకులు తాజాగా మరో కీలక ముందడుగు వేశారు. అమెరికాలోని అలబామాలో- జన్యుమార్పిడి చేసిన ఓ పంది నుంచి సేకరించిన మూత్రపిండాలను.. బ్రెయిన్‌ డెడ్‌ అయిన వ్యక్తికి అమర్చారు. అనంతరం మూడు రోజుల పాటు వాటి పనితీరును పరిశీలించారు. జీవన్మృతుడి శరీరం ఆ మూత్రపిండాలను తిరస్కరించిన సంకేతాలేవీ కనిపించలేదని అలబామా విశ్వవిద్యాలయానికి చెందిన డాక్టర్‌ జేమీ లాకీ గురువారం తెలిపారు. అవయవ మార్పిడి తర్వాత ఆ వ్యక్తిని ప్రాణాధార వ్యవస్థపై ఉంచిన మూడు రోజుల పాటూ అవి సక్రమంగా పనిచేసినట్లు వెల్లడించారు.