జన్యుపరమైన కారణాలతోనే వృద్ధుల్లో కొవిడ్‌ తీవ్రరూపం!

వాషింగ్టన్‌: వృద్ధుల్లో కరోనా మహమ్మారి ఎక్కువ ప్రభావం చూపుతుండటానికి జన్యుపరమైన అంశాలే కారణమని పరిశోధకులు తాజాగా గుర్తించారు. సాధారణంగా శరీరం రోగనిరోధక కణాలను ఎంత వేగంగా వృద్ధి చేసుకుంటుందన్నదానిపైనే.. కొవిడ్‌ సహా ఎలాంటి ఇన్‌ఫెక్షన్‌నైనా మనం ఎంత సమర్థంగా ఎదుర్కొంటామన్నది ఆధారపడి ఉంటుంది. వయోభారం మీదపడేకొద్దీ ఆ కణాలను త్వరితగతిన అభివృద్ధి చేసుకునే సామర్థ్యం తగ్గిపోతుంటుందని అమెరికాలోని వాషింగ్టన్‌ విశ్వవిద్యాలయం పరిశోధకులు ఓ అధ్యయనంలో గుర్తించారు. ‘‘కణ విభజన జరిగినప్పుడల్లా డీఎన్‌ఏ ముక్కలవుతుంది. దాని చివర ఉండే టెలోమియర్‌ ప్రతి విభజనతో మరింత పొట్టిగా మారుతుంది. ఒకానొక దశలో అది మరీ పొట్టిగా అయిపోయి.. విభజన ఆగిపోతుంది. అన్ని కణాల్లో కాకుండా, మానవుల రోగనిరోధక కణాల్లోనే ఈ పరిమితి కనిపిస్తోంది’’ అని వాషింగ్టన్‌ విశ్వవిద్యాలయం ప్రొఫెసర్‌ జేమ్స్‌ అండర్సన్‌ తెలిపారు. ఇలాంటి పరిమితి ఉన్నప్పటికీ సగటు వ్యక్తుల్లో రోగనిరోధక వ్యవస్థ 50 ఏళ్ల వరకూ బాగానే పనిచేస్తోందని పేర్కొన్నారు.