త్వరలో తగ్గనున్న పామాయిల్‌ ధరలు!

 వంటనూనె ఎగుమతిపై నిషేధం  

 ఎత్తివేతకు ఇండోనేసియా నిర్ణయం 

జకార్తా: ప్రపంచవ్యాప్తంగా చుక్కలనంటుతున్న వంటనూనెల ధరలు త్వరలోనే కాస్త దిగువకు వచ్చే అవకాశాలు కనిపిస్తున్నాయి. తమ దేశం నుంచి పామాయిల్‌ ఎగుమతిపై నెల రోజులుగా అమల్లో ఉన్న నిషేధాన్ని ఎత్తివేయాలని ఇండోనేసియా తాజాగా నిర్ణయించడమే ఇందుకు కారణం. ఈ నెల 23 నుంచి తమ నిర్ణయాన్ని అమల్లోకి తీసుకురానున్నట్లు దేశాధ్యక్షుడు జోకో విడొడొ వెల్లడించారు. ప్రపంచంలో 85% పామాయిల్‌ ఇండోనేసియా, మలేసియాల్లోనే ఉత్పత్తవుతుంటుంది. దేశీయంగా కొరతను నివారించడంతో పాటు ధరలకు కళ్లెం వేసేందుకుగాను వంటనూనెల ఎగుమతిపై ఇండోనేసియా నిషేధం విధించడంతో.. ప్రపంచవ్యాప్తంగా అనేక ప్రాంతాల్లో పామాయిల్‌ రేట్లు రెట్టింపు కన్నా ఎక్కువగా పెరిగిన సంగతి గమనార్హం.