ఒంటికాలిపై 10 సెకన్లు కూడా నిలబడలేకపోతున్నారా?

బ్రసీలియా: మీరు మధ్య వయస్కులా? అయితే- ఏ సహాయమూ తీసుకోకుండా ఒంటికాలి మీద 10 సెకన్ల పాటు సరిగా నిలబడగలుగుతున్నారో లేదో చూసుకోండి. ఎందుకు అని ఆశ్చర్యపోతున్నారా? బ్రెజిల్‌, ఫిన్లాండ్‌, ఆస్ట్రేలియా, బ్రిటన్‌, అమెరికాలకు చెందిన పలువురు పరిశోధకులు తాము సంయుక్తంగా చేపట్టిన ఓ అధ్యయనంలో కీలక అంశాన్ని గుర్తించారు. ఏ సహాయమూ లేకుండా ఒంటికాలి మీద 10 సెకన్ల పాటు నిలబడలేకపోతున్నవారిలో మృత్యు ముప్పు ఇతరులతో పోలిస్తే ఎక్కువగా ఉన్నట్లు తేలిందని వారు తెలిపారు. బ్రెజిల్‌లో 50 ఏళ్లకు పైగా వయసున్న 1,702 మందికి ఈ పరీక్ష పెట్టగా.. అందులో విఫలమైనవారిలో 17.5% మంది పదేళ్ల కాల వ్యవధిలోనే వివిధ అనారోగ్య కారణాలతో కన్నుమూశారని పేర్కొన్నారు. తమ పరీక్ష పాసైనవారిలో మాత్రం కేవలం 4.5% మంది పదేళ్ల లోపు మరణించారని వివరించారు.