నార్వేలో ఉగ్ర దాడి!

దుండగుడి కాల్పుల్లో ఇద్దరి మృతి, 20 మందికి గాయాలు

ఓస్లో: నార్వే రాజధాని ఓస్లోలో సాయుధ దుండగుడు(42) జరిపిన కాల్పుల్లో ఇద్దరు మృతి చెందారు. మరో 20 మంది గాయపడ్డారు. ఇరాన్‌ జాతీయుడైన నార్వే పౌరుడు ఈ ఘాతుకానికి పాల్పడ్డాడు. స్వలింగ సంపర్కుల సమూహం(ఎల్జీబీటీక్యూ) ప్రదర్శనకు సన్నాహాలు చేసుకుంటున్న నైట్‌ క్లబ్‌ వద్ద, నగరంలోని మరో రెండు చోట్ల నిందితుడు కాల్పులకు తెగించాడు. పోలీసులు అతనిని అదుపులోకి తీసుకుని విచారిస్తున్నారు. ప్రజల్లో భయోత్పాతం సృష్టించేందుకు జరిపిన ఉగ్రదాడి కావచ్చని ప్రాథమికంగా భావిస్తున్నారు. నిందితుడు ఏ లక్ష్యంతో ఈ దాడికి పాల్పడ్డాడు, అతని వెనుక ఎవరున్నారో నిర్ధరించుకునే యత్నంలో పోలీసులున్నారు. దుండగుడి మానసిక ఆరోగ్య పరిస్థితిపైనా ఆరా తీస్తున్నారు.