జైల్లో పరుపులకు నిప్పుపెట్టిన ఖైదీలు

కొలంబియాలోని తులువా నగరంలో 51 మంది దుర్మరణం

బొగొటా: నైరుతి కొలంబియాలోని ఓ జైల్లో ఖైదీల ఘర్షణల కారణంగా మంటలు చెలరేగి 51 మంది దుర్మరణం పాలయ్యారని, మరికొందరు గాయపడ్డారని జైలు అధికారులు మంగళవారం తెలిపారు. తులువా నగరంలోని జైల్లో ఖైదీలు అల్లర్లకు యత్నించిన సమయంలో ఈ ఘటన చోటుచేసుకున్నట్లు తెలుస్తోందని కొలంబియా జాతీయ ప్రిజన్‌ సిస్టమ్‌ డైరెక్టర్‌ టిటో కెస్టెల్లనాస్‌ తెలిపారు. తదుపరి పరిణామాలను పట్టించుకోకుండా ఖైదీలు పరుపులకు నిప్పు పెట్టారని, దీంతో మంటలు చెలరేగి 49 మరణించారని వెల్లడించారు. అనంతరం న్యాయమంత్రిత్వశాఖ మరణించిన వారి సంఖ్యను 51గా పేర్కొంది. మరోవైపు, మరణించిన వారంతా ఖైదీలేనా? అన్న విషయమై స్పష్టత లేదని టిటో చెప్పారు. 20 మంది ఖైదీలు ఆసుపత్రిలో చికిత్స పొందుతున్నారని, జైల్లో పనిచేసే గార్డులు ఇద్దరికి స్వల్ప గాయాలైనట్లు న్యాయశాఖ మంత్రి విల్సన్‌ రూయిజ్‌ తెలిపారు.