పాక్‌లో పోలియో టీకా బృందంపై కాల్పులు

ముగ్గురి మృతి

పెషావర్‌: పాకిస్థాన్‌లోని ఉత్తర వజీరిస్థాన్‌ గిరిజన జిల్లాలో మంగళవారం పోలియో టీకా బృందంపై గుర్తుతెలియని దుండగులు జరిపిన కాల్పుల్లో ముగ్గురు వ్యక్తులు మరణించారు. వీరిలో ఇద్దరు బృందానికి రక్షణ కల్పిస్తున్న పోలీసులు కాగా మరొకరు వ్యాక్సిన్‌ సిబ్బంది. ఇంటింటికి తిరిగి వ్యాక్సిన్‌ వేస్తున్న సమయంలో ముష్కరులు కాల్పులకు పాల్పడినట్లు పోలీసులు తెలిపారు. అఫ్గానిస్థాన్‌ సరిహద్దుల్లోని వజీరిస్థాన్‌లో ఇటీవల తొమ్మిది పోలియో కేసులు నమోదు కావడంతో ఆ ప్రాంతంలో పోలియో టీకా పంపిణీ కార్యక్రమం చేపట్టారు. ఈ కాల్పులకు తమదే బాధ్యత అని ఇప్పటి వరకూ ఏ ఉగ్రవాద సంస్థ ప్రకటించుకోలేదు.