Israel: ఆగని ఇజ్రాయెల్‌ దాడులు

15కు చేరిన మృతుల సంఖ్య
గాజాపై విరుచుకుపడుతున్న యుద్ధ విమానాలు

గాజాసిటీ: గాజాపై ఇజ్రాయెల్‌ వైమానిక దాడులు శనివారమూ కొనసాగాయి. గాజాసిటీతో పాటు వివిధ నగరాలపై బాంబుల వర్షం కురిసింది. పాలస్తీనా ఇస్లామిక్‌ జిహాద్‌ (పీఐజె) ఉగ్రవాదులు లక్ష్యంగా యుద్ధవిమానాలు విరుచుకుపడ్డాయి. ఆ సంస్థ మిలిటెంట్లు నివాసం ఉంటున్న భవనాలను నేలమట్టం చేశాయి. శుక్రవారం నుంచి మొదలైన ఈ దాడుల్లో ఇప్పటివరకు 15 మంది మృతి చెందారు. ఇందులో పీఐజె సీనియర్‌ కమాండర్‌తో పాటు.. ఐదేళ్ల చిన్నారి, ఇద్దరు మహిళలూ ఉన్నారు. ఇజ్రాయెల్‌ దాడులకు తీవ్రంగా స్పందించే హమాస్‌ ఈసారి ఆచితూచి వ్యవహరిస్తోంది. ప్రతీకార దాడులకు ఇంకా పాల్పడలేదు. పీఐజె మిలిటెంట్లే.. ఇజ్రాయెల్‌ నగరాలపై రాకెట్లను ప్రయోగిస్తున్నారు. శనివారం.. ఇజ్రాయెల్‌ క్షిపణి ఓ కారును ఢీ కొట్టిన ఘటనలో 75 ఏళ్ల మహిళ ప్రాణాలు కోల్పోయారు. ఆరుగురు గాయపడ్డారు. పీఐజె సభ్యుడు నివాసం ఉంటున్న రెండంతస్తుల భవనాన్ని యుద్ధవిమానాలు ధ్వంసం చేశాయి. తాజా దాడులతో గాజాలోని ఏకైక విద్యుత్కేంద్రం కూడా మూతపడింది.