లండన్‌లో దాదాభాయ్‌ నౌరోజీ స్మృతికి నీరాజనం

లండన్‌: ‘గ్రాండ్‌ ఓల్డ్‌ మ్యాన్‌ ఆఫ్‌ ఇండియా’గా ప్రసిద్ధి చెందిన దాదాభాయ్‌ నౌరోజీ దక్షిణ లండన్‌లో ఎనిమిదేళ్లపాటు నివసించిన గృహానికి బుధవారం నీలి ఫలకాన్ని అలంకరించినట్లు ఇంగ్లిష్‌ హెరిటేజ్‌ ఛారిటీ సంస్థ ప్రకటించింది. భారతదేశ 75వ స్వాతంత్య్ర దినోత్సవాలను పురస్కరించుకుని ఈ గౌరవాన్ని ప్రదానం చేసినట్లు తెలిపింది. ఈమేరకు దాదాభాయ్‌ నౌరోజీ అప్పట్లో నివసించిన ఇటుక రాతి గృహానికి అలంకరించిన నీలి ఫలకం మీద ఆయన వివరాలను లిఖించారు. లండన్‌లో చారిత్రక ప్రాముఖ్యత కలిగిన భవనాలకు నీలి ఫలకాలను అలంకరించే బ్లూ ప్లేక్‌ పథకాన్ని ఇంగ్లిష్‌ హెరిటేజ్‌ నిర్వహిస్తోంది. లండన్‌లో మహాత్మా గాంధీ, బీఆర్‌ అంబేడ్కర్‌లు నివసించిన గృహాలనూ ఇదేవిధంగా గౌరవించింది.