రష్యా ఉగ్రవాద దేశమే

లాత్వియా పార్లమెంటు తీర్మానం

బెర్లిన్‌: రష్యాను ఉగ్రవాద దేశంగా లాత్వియా ప్రకటించింది. ఉక్రెయిన్‌లోని పౌరులపై మాస్కో చేస్తున్న దాడులను ఉగ్రవాద చర్యలుగా అభివర్ణించింది. ఈ మేరకు ఆ దేశ పార్లమెంటు ఓ తీర్మానం ఆమోదించింది. 100 మంది సభ్యుల పార్లమెంటులో 67 మంది రష్యా ఉగ్రవాద దేశంగా పేర్కొంటూ తీర్మానానికి అనుకూలంగా ఓటు వేశారు. 16 మంది గైర్హాజరయ్యారు. ఇతర దేశాలు కూడా రష్యాను ఉగ్రవాద దేశంగా ప్రకటించాలని లాత్వియా కోరింది. మరోవైపు ఉక్రెయిన్‌కు మరిన్ని ఆయుధాలు సరఫరా చేస్తామని పశ్చిమదేశాలు గురువారం ప్రకటించాయి. ఇందులో జర్మనీ, నెదర్లాండ్స్‌, అమెరికా ఉన్నాయి. రష్యా నుంచి బొగ్గు దిగుమతులపై ఐరోపా యూనియన్‌ కీలక నిర్ణయం తీసుకుంది. మాస్కో బొగ్గు దిగుమతులపై నిషేధం విధిస్తున్నట్లు పేర్కొంది.