ద్వైపాక్షిక సంబంధాలపై మోదీ, మెక్రాన్‌ సమీక్ష

దిల్లీ: ద్వైపాక్షిక సంబంధాలు, రక్షణరంగంలో సహకారం వంటి అంశాలపై భారత ప్రధాని నరేంద్రమోదీ, ఫ్రాన్స్‌ అధ్యక్షుడు ఇమ్మాన్యుయేల్‌ మెక్రాన్‌ మంగళవారం ఫోన్‌ సంభాషణలో చర్చించుకున్నారు. పౌర అణు ఇంధన రంగంలో సహకారం, భౌగోళిక-రాజకీయపరమైన సవాళ్లు వంటివి వారిమధ్య సమీక్షకు వచ్చాయి. రష్యా-ఉక్రెయిన్‌ యుద్ధ నేపథ్యంలో ఆహార భద్రతకు తలెత్తే ముప్పుపై రెండు దేశాలూ ఇదివరకే ఆందోళన వ్యక్తంచేశాయి. కార్చిచ్చు, కరవులను ఎదుర్కోవడంలో ఫ్రాన్స్‌కు సహకారాన్ని అందిస్తామని మోదీ హామీ ఇచ్చారు. ఇటీవలి ఏళ్లలో రెండు దేశాల మధ్య భాగస్వామ్యం బలపడుతుండడంపై నేతలు సంతృప్తి వ్యక్తంచేశారు. మరిన్ని రంగాలకు సహకారాన్ని విస్తరించుకోవాలని నిర్ణయించారు.