24న మళ్లీ శ్రీలంకకు గొటబాయ!

కొలంబో: ప్రజాందోళనతో దేశం విడిచి, గత నెల రోజులకు పైగా విదేశాల్లో తల దాచుకొంటున్న శ్రీలంక మాజీ అధ్యక్షుడు గొటబాయ రాజపక్స మళ్లీ స్వదేశానికి తిరిగిరానున్నారు. ఈ నెల 24న ఆయన తిరిగి వస్తారని గొటబాయకు సోదరుడి వరసైన ఉదయంగ వీరతుంగ బుధవారం వెల్లడించారు. ‘ఆయన నాతో ఫోనులో మాట్లాడారు. వచ్చేవారం ఇక్కడికి వస్తారు’ అని తెలిపారు. వీరతుంగ 2006 - 15 మధ్యకాలంలో శ్రీలంక రాయబారిగా రష్యాలో పనిచేశారు. సింగపూర్‌ నుంచి ప్రత్యేక విమానంలో ఆగస్టు 11న బ్యాంకాక్‌ చేరిన గొటబాయ భద్రత కారణాల రీత్యా హోటల్‌ గదుల్లోనే ఉంటున్నారు.