జాబిల్లిని చేరేందుకు భారీ రాకెట్‌

 ఆర్టెమిస్‌ మిషన్‌ కోసం సిద్ధం చేసిన నాసా

వాషింగ్టన్‌: జాబిల్లిపైకి యాత్రలు చేపట్టేందుకు ఆర్టెమిస్‌ మిషన్‌ను తలపెట్టిన అమెరికా అంతరిక్ష పరిశోధన సంస్థ ‘నాసా’ తాజాగా కీలక ముందడుగు వేసింది. ఈ మిషన్‌ను సాకారం చేసుకునే ప్రయత్నాల్లో భాగంగా తయారుచేసిన భారీ రాకెట్‌- ‘స్పేస్‌ లాంచ్‌ సిస్టమ్‌ (ఎస్‌ఎల్‌ఎస్‌)’ను ఫ్లోరిడాలోని కెన్నడీ అంతరిక్ష కేంద్రంలో 39బి ప్యాడ్‌కు చేర్చింది. ఈ నెల 29న దాన్ని తొలిసారి ప్రయోగించనున్నారు. భవిష్యత్తులో చందమామ ఉపరితలంపైకి వ్యోమగాములను పంపేందుకు ఈ రాకెట్‌ను వినియోగించనున్నారు. 29న మాత్రం మానవరహితంగానే ప్రయోగించనున్నారు. ఎస్‌ఎల్‌ఎస్‌ పొడవు 100 మీటర్లు. ఇందులో వ్యోమగాములను తీసుకెళ్లేందుకు పొందుపర్చిన ‘ఒరాయన్‌’ క్యాప్సుల్‌ 5 మీటర్ల వెడల్పు ఉంటుంది. 1960ల్లో, 70ల్లో చంద్రుడిపైకి మానవులను పంపేందుకు ఉపయోగించిన క్యాప్సుల్స్‌తో పోలిస్తే దీని వెడల్పు ఒక మీటరు ఎక్కువ. ఆర్టెమిస్‌తో జాబిల్లి యాత్రలను దిగ్విజయంగా పూర్తిచేసుకోగలిగితే.. 2030వ దశకంలో లేదా ఆ తర్వాత అంగారకుడిపైకి మానవసహిత యాత్రలను చేపట్టేందుకు అది గొప్ప ముందడుగుగా మారుతుందన్నది నాసా యోచన.