వదంతులను ట్వీట్‌ చేశారంటూ సౌదీ మహిళకు 34 ఏళ్ల జైలుశిక్ష

దుబాయ్‌: వదంతులను ట్వీట్‌ చేశారన్న అభియోగాలపై సౌదీ అరేబియాలో ఓ మహిళకు కోర్టు 34 ఏళ్ల జైలుశిక్ష విధించడం సంచలనం సృష్టించింది. సల్మా అల్‌ షెబాబ్‌ సౌదీలో మైనారిటీగా ఉన్న షియా ముస్లిం వర్గానికి చెందినవారు. ఆమెకు ఇద్దరు పిల్లలు ఉన్నారు. బ్రిటన్‌లోని లీడ్స్‌ విశ్వవిద్యాలయంలో పరిశోధక విద్యార్థిగా ఉన్న ఆమె గత ఏడాది జనవరిలో సెలవులకు సౌదీ రాగా.. పోలీసులు అదుపులోకి తీసుకున్నారు. ట్వీట్ల ద్వారా వదంతులను ప్రచారం చేశారని, సౌదీలో అసమ్మతి నేతల ట్వీట్లను రీట్వీట్‌ చేశారని ఆమెపై అభియోగాలు మోపారు. వీటిపై విచారణ నిర్వహించిన కోర్టు తొలుత ఆరేళ్ల జైలుశిక్ష విధించింది. ఆ తీర్పును అల్‌ షెబాబ్‌ సవాలు చేయగా.. పైకోర్టు ఆమెకు 34 ఏళ్ల కారాగారవాసాన్ని ఖరారు చేసింది.