Heart Failure: గుండె వైఫల్యాన్ని ఇక ఇట్టే తెలుసుకోవచ్చు

లండన్‌: గుండె వైఫల్యాన్ని అత్యంత త్వరగా గుర్తించే వినూత్న సాంకేతికతను యూనివర్సిటీ ఆఫ్‌ ఈస్ట్‌ ఆంగ్లియా పరిశోధకులు అభివృద్ధి చేశారు. సంప్రదాయ ఎంఆర్‌ఐ ద్వారా హృద్రోగ నిర్ధారణకు 20 నిమిషాలు పడుతుంటే- శాస్త్రవేత్తలు రూపొందించిన తాజా సాంకేతికత ఫలితంగా కేవలం 8 నిమిషాల్లోనే ఈ ప్రక్రియ పూర్తవుతున్నట్టు పరిశోధనకర్త హోసమాదిన్‌ అసాది వెల్లడించారు. ‘‘ఎంఆర్‌ఐ సాంకేతికతను ఉపయోగించడం ద్వారా గుండె రక్త ప్రవాహానికి సంబంధించి 4 డైమెన్షనల్‌ చిత్రాలను అభివృద్ధి చేశాం. ‘ఫోర్‌డీ ఫ్లో ఎంఆర్‌ఐ’గా పిలుస్తున్న ఈ టెక్నాలజీ... గుండె కవాటాలు, రక్త ప్రసరణకు సంబంధించి అత్యంత కచ్చితమైన చిత్రాలను అందిస్తోంది. తద్వారా సమస్యను లోతుగా అర్థం చేసుకుని, మెరుగైన చికిత్సను సత్వరం అందించేందుకు అవకాశం ఉంటుంది’’ అని పరిశోధకులు పేర్కొన్నారు. యూరోపియన్‌ రేడియాలజీ ఎక్స్‌పెరిమెంటల్‌ పత్రిక ఈ వివరాలు అందించింది.