నోబెల్‌ విజేతపై లైంగిక వేధింపుల ఆరోపణలు

వాటికన్‌ సిటీ: ఇండోనేసియా సమీప తిమోర్‌ దీవిలో అందించిన సేవలకుగాను 1996లో నోబెల్‌ శాంతి బహుమతి గెలుచుకున్న కేథలిక్‌ బిషప్‌ కార్లోస్‌ జిమెనెస్‌ బెలోను లైంగిక వేధింపుల ఆరోపణలు చుట్టుముట్టడంతో వాటికన్‌ సిటీ ఉక్కిరిబిక్కిరి అవుతోంది. డచ్‌ పత్రికలో వెలువడ్డ కథనం మేరకు.. 1990ల ప్రాంతంలో తూర్పు తిమోర్‌లో సేవలందించిన బెలో ఆ సమయంలో కొందరు బాలురను లైంగికంగా వేధించారు. పోర్చుగల్‌లో ఉంటున్న బెలోను ఈ ఆరోపణలపై ఓ ప్రయివేటు రేడియో ఫోను ద్వారా వివరణ కోరగా.. ఆయన స్పందించలేదు. నోబెల్‌ కమిటీ, ఐక్యరాజ్య సమితి కూడా దీనిపై వెంటనే ఎటువంటి ప్రకటన చేయలేదు. బిషప్‌ బెలో ప్రవర్తనపై ఆరోపణలు రావడంతో గత రెండేళ్లుగా ఆయనపై  క్రమశిక్షణపరంగా పలు ఆంక్షలను తాము విధించినట్లు వాటికన్‌ సిటీ అధికార ప్రతినిధి బ్రూనీ గురువారం వెల్లడించారు.