బీజింగ్‌లో బీయింగ్‌ మహాత్మా నాటిక ప్రదర్శన

బీజింగ్‌: కొవిడ్‌ కారణంగా వచ్చిన రెండేళ్ల విరామం తర్వాత.. చైనాలోని విశాలమైన చావోయాంగ్‌ పార్కులో మళ్లీ గాంధీ జయంతి వేడుకలు జరిగాయి. బీజింగ్‌లోని డజను స్కూళ్ల పిల్లలు, ప్రవాస భారతీయులు ఈ పార్కులో సమావేశం కాగా.. మహాత్ముడి బోధలు, భజనలతో ఆ ప్రాంతం ప్రతిధ్వనించింది. చేతిలో పుస్తకంతో కూర్చొన్న మహాత్ముడి విగ్రహాన్ని ఈ పార్కులో 2005లో ప్రతిష్ఠించారు. గాంధీ విగ్రహ శిల్పి యాన్‌ జికున్‌, చైనాలో భారత రాయబారి ప్రదీప్‌కుమార్‌ రావత్‌ ఈ సందర్భంగా మహాత్ముడి బోధల గురించి మాట్లాడారు. స్థానిక మ్యూజియంలో ప్రదర్శించిన ‘బీయింగ్‌ మహాత్మా’ నాటిక ఈ కార్యక్రమాల్లో విశేషాంశంగా నిలిచింది. భారత ఎంబసీ అధికారి టి.ఎస్‌.వివేకానంద నాటికను రచించి, దర్శకత్వం వహించారు. ఈ కార్యాలయంలోని భద్రతా అధికారి జోజి లుకా మహాత్ముడి పాత్ర పోషించారు.