అమెరికాలో నేరగాళ్లను చంపే రోబోలు

ఇంటర్నెట్‌ డెస్క్‌: అమెరికాలో ఇటీవల ఎక్కడ చూసినా విచ్చలవిడిగా కాల్పుల ఘటనలు చోటుచేసుకుంటున్నాయి. ఈ దారుణాలను అరికట్టేందుకు శాన్‌ఫ్రాన్సిస్కో పోలీసులు సరికొత్త ప్రతిపాదన తీసుకొచ్చారు. కాల్పుల వంటి తీవ్రమైన ఘటనలకు ప్రయత్నించే నేరగాళ్లను అంతమొందించేందుకు రోబో పోలీసులను ఉపయోగించాలని యోచిస్తున్నారు. ఈ మేరకు ముసాయిదా ప్రణాళికను రూపొందించారు.  శాన్‌ఫ్రాన్సిస్కో పోలీసు విభాగంలో ప్రస్తుతం 17 రోబోలు ఉన్నాయి. ఇందులో 12 నిర్వహణలో లేవు. మిగతా వాటిని బాంబు తనిఖీలు, నిర్వీర్యానికి ఉపయోగిస్తున్నారు. తీవ్రమైన నేర ఘటనల్లోనూ వీటిని వినియోగించాలని అక్కడి పోలీసులు భావిస్తున్నారు. ఇందులో భాగంగానే కాల్పుల వంటి ఘటనలను తిప్పికొట్టే క్రమంలో నేరగాళ్లను చంపేసేలా రోబోల సామర్థ్యాన్ని పెంచాలని యోచిస్తున్నారు. మెషిన్‌గన్లు, గ్రనేడ్‌ లాంఛర్లతో వాటిని తీర్చిదిద్దాలని ముసాయిదాలో పేర్కొన్నారు. దీనిపై వచ్చేవారం జరిగే ఉన్నత స్థాయి సమావేశంలో చర్చించి నిర్ణయం తీసుకోనున్నారు.