ఉగ్రవాదులు నక్కిన హోటల్‌పై దాడులు

ఆరుగురు ముష్కరుల హతం

మొగదిషు: సోమాలియా రాజధాని మొగదిషులో ఇస్లామిక్‌ తీవ్రవాదులు నక్కిన విల్లా రోసా హోటల్‌పై పోలీసులు దాడి చేశారు. కాల్పుల ధాటికి ఆరుగురు ఉగ్రవాదులు, ఓ పోలీసు సిబ్బంది మరణించినట్టు అధికారులు సోమవారం వెల్లడించారు. సోమాలియా ప్రభుత్వాన్ని తీవ్రంగా వ్యతిరేకిస్తున్న అల్‌-షబాబ్‌ ఉగ్రవాద సంస్థ... పలుచోట్ల దాడులు చేపట్టి, ఎనిమిది మంది అమాయకులను హతమార్చింది. ఈ దాడుల అనంతరం ఉగ్రవాదులు విల్లా రోసా హోటల్‌లోకి చొరబడ్డారు. అక్కడున్న 60 మంది సామాన్యులను బంధించారు. 18 గంటల హైడ్రామా అనంతరం పోలీసులు ఆ హోటల్‌పై చాకచక్యంగా దాడి చేశారు. ఉగ్రవాదులను హతమార్చి, అక్కడ చిక్కుకున్న 60 మందిని సురక్షితంగా విడిపించారు. సోమాలియా సర్కారును పడగొట్టి, షరియా చట్టాన్ని అమలు చేసేందుకు అల్‌-షబాబ్‌ ప్రయత్నిస్తోంది. ఇది కరడుగట్టిన ఉగ్రవాద సంస్థ అని అమెరికా గతంలోనే ప్రకటించింది.