హృద్రోగం కట్టడికి సరికొత్త ఔషధం

వాషింగ్టన్‌: హృద్రోగ చికిత్సకు జరుగుతున్న పరిశోధనల్లో మరో మైలురాయి! రక్తనాళాలు పూడుకుపోయే పరిస్థితిని అడ్డుకొనే కొత్త ఔషధ తయారీకి బాటలు పడ్డాయి. గుండెకు రక్తాన్ని తీసుకెళ్లే నాళాల్లో కొలెస్ట్రాల్‌, కొవ్వు పదార్థాలు చేరడం ఆరంభమైతే... ఆ రక్తనాళాలు మృదువుగా, ఆరోగ్యంగా ఉండేందుకు దోహదపడే కండర కణాల పరిమాణం, సంఖ్య పెరిగిపోతుంది. ఫలితంగా రక్తనాళాలు పూడుకుపోయి.. బాధితులకు స్టంట్లు వేయడం, బైపాస్‌ సర్జరీ చేయడం అనివార్యమవుతుంది. ఈ సమస్యపై జార్జియా మెడికల్‌ కళాశాల శాస్త్రవేత్తలు పరిశోధన సాగించారు. ‘‘రక్తనాళాల్లో ఉండే ‘ఎండోథెలియాల్‌’ కణాలు.. ఆ నాళాల మృదు కండరాలకు నిత్యం సంకేతాలు పంపుతాయి. నాళాల్లో కొవ్వు చేరికతో ఆ సంకేతాలు దెబ్బతిని, మృదు కండర కణజాలం పెరుగుతోంది. ‘ఏటీఐసీ జన్యువు’ను లక్ష్యంగా చేసుకుని ఔషధాన్ని రూపొందిస్తే.. మృదు కండర కణజాలం పెరుగుదలకు కారణమవుతున్న ప్యూరిన్‌’ను అడ్డుకోవచ్చు. తద్వారా హృద్రోగ సమస్యను నివారించవచ్చు’’ అని పరిశోధకులు వివరించారు.