చమురు ధరపై పరిమితికి ఒప్పుకోం : రష్యా

కీవ్‌: రష్యా చమురు ధరపై పరిమితి విధించాలన్న పశ్చిమ దేశాల నిర్ణయం కొత్త వివాదాన్ని రాజేసింది. దీనిపై పుతిన్‌ సర్కారు మండిపడింది. ధర తగ్గింపును సమర్థించిన దేశాలకు సరఫరాను నిలిపివేస్తామని హెచ్చరించింది. రష్యాకు తాము చెల్లించే చమురు ధరను పీపాకు 60 డాలర్లకు పరిమితం చేసుకోవాలని అమెరికా, బ్రిటన్‌, కెనడా, ఆస్ట్రేలియా, జపాన్‌తోపాటు ఐరోపా సంఘంలోని 27 దేశాలు శుక్రవారం నిర్ణయించాయి. సోమవారం నుంచి ఇది అమలుకానుంది. దీనిపై రష్యా అధ్యక్ష భవనం క్రెమ్లిన్‌ అధికార ప్రతినిధి దిమిత్రి పెస్కోవ్‌ స్పందించారు. పరిస్థితిని విశ్లేషించాకే భవిష్యత్‌ కార్యాచరణను నిర్ణయిస్తామన్నారు. అయితే ధరపై పరిమితిని ఆమోదించబోమని స్పష్టంచేశారు. ఇలాంటి నిర్ణయాన్ని సమర్థించే ఐరోపా దేశాలు.. ఆ తర్వాత విచారించాల్సి ఉంటుందని వియన్నాలోని అంతర్జాతీయ సంస్థల్లో రష్యా శాశ్వత ప్రతినిధి మిఖాయిల్‌ ఉల్యనోవ్‌ స్పష్టంచేశారు. రష్యా చమురుకు ఐరోపా దూరం కావాల్సి వస్తుందని హెచ్చరించారు. మరోవైపు రష్యా ఇంధన ధరను మరింత తగ్గించాలని ఉక్రెయిన్‌ అధ్యక్ష భవనం.. ఐరోపా దేశాలకు సూచించింది.