ఇండోనేసియాలో మౌంట్‌ సెమెరు అగ్నిపర్వత విస్ఫోటం

జకర్తా: ఇండోనేసియాలోని తూర్పు జావా ప్రావిన్స్‌లో మౌంట్‌ సెమెరు అగ్నిపర్వతం ఆదివారం విస్ఫోటం చెందడంతో దట్టమైన బూడిద మేఘాలు ఆవరించాయి. భారీగా లావా విడుదలైంది. ‘రుతుపవన వర్షాల ధాటికి 3,676 మీటర్ల ఎత్తులోని మౌంట్‌ సెమెరుపై లావా గోపురం సైతం కూలిపోయింది. అనేక గ్రామాలను బూడిద కప్పేసి ఎండను నిరోధించింది. ఎలాంటి ప్రాణనష్టం జరగలేదు. వందల మంది సురక్షిత ప్రాంతాలకు వెళ్లిపోయారు. బూడిద పొరలు 1500 మీటర్ల ఎత్తుకు పైగా ఎగిశాయి. సెమెరు అగ్నిపర్వతం వాలుల నుంచి లావా సమీపంలోని నదివైపు ప్రవహించింది’ అని జాతీయ విపత్తు నిర్వహణ సంస్థ ప్రతినిధి అబ్దుల్‌ ముహారి తెలిపారు.