చైనాలో కొవిడ్‌తో మరో ఇద్దరి మృతి

హాంకాంగ్‌: చైనాలోని కొన్ని నగరాల్లో కొవిడ్‌ ఆంక్షలను సడలించిన నేపథ్యంలో ఆదివారం మరో రెండు మరణాలు నమోదయ్యాయి. షాన్‌డాంగ్‌, సిచువాన్‌ ప్రావిన్సుల్లో ఇద్దరు మృతి చెందినట్లు జాతీయ ఆరోగ్య కమిషన్‌ తెలిపింది. అయితే మృతుల వయసు, టీకాలు వేయించుకున్నారా? వంటి వివరాలేమీ వెల్లడించలేదు. జాతీయ ఆరోగ్య కమిషన్‌ గణాంకాల ప్రకారం చైనాలో 90% ప్రజలకు టీకాలు వేశారు. అయినా అక్కడి ప్రజల్లో తక్కువమందిలో మాత్రమే యాంటీబాడీలు వృద్ధి చెందినట్లు తెలుస్తోంది. ఈ నేపథ్యంలో ఆంక్షలను పూర్తిగా ఎత్తివేస్తే లక్షల సంఖ్యలో మరణాలు సంభవించే అవకాశం ఉందన్న భయాందోళనలు వ్యక్తమవుతున్నాయి. చైనాలో ఆదివారం కొత్తగా 35,775 కేసులు నమోదయ్యాయి. దీంతో మొత్తం కేసుల సంఖ్య 3,36,165కి చేరగా ఇంతవరకు మహమ్మారి బారినపడి 5,235 మంది మృతి చెందారు. చైనాకు వచ్చే ప్రయాణికులకు ఇప్పటికీ క్వారంటైన్‌ నిబంధనను అమలు చేస్తున్నారు.