వాహనాలను ముంచెత్తిన బురద

కొలంబియాలో 34 మంది మృతి

బొగోటా: కొలంబియాలో భారీవర్షాలకు బురద, మట్టి ముంచెత్తడంతో హైవేపై ప్రయాణిస్తున్న 34 మంది ప్రయాణికులు మృతిచెందారు. సెంట్రల్‌ కొలంబియాలోని ప్యుబ్లో రికో పట్టణంలో ఈ దుర్ఘటన జరిగింది. హైవే పక్కనే ఉన్న కొండ నుంచి మట్టి, బురద పెద్దఎత్తున జారిపడి ఆ మార్గంలో వెళుతున్న బస్సును రెండు మీటర్ల ఎత్తున ముంచెత్తింది. ఆ సమయంలో బస్సులో 33 మంది ప్రయాణికులు ఉన్నట్లు అధికారులు గుర్తించారు. ఆరుగురితో ప్రయాణిస్తున్న కారు, ఇద్దరు ప్రయాణిస్తున్న ఓ ద్విచక్రవాహనం సైతం ఈ ప్రమాదంలో దెబ్బతిన్నాయి. మృతుల్లో 8 మంది చిన్నారులు ఉన్నట్లు అధికారులు తెలిపారు.