కృష్ణ వావిలాలకు యూఎస్‌ ప్రెసిడెన్షియల్‌ జీవితకాల సాఫల్య పురస్కారం

హ్యూస్టన్‌: భారతీయ అమెరికన్‌ కృష్ణ వావిలాలను అమెరికాలోనే అత్యున్నత పురస్కారమైన ప్రెసిడెన్షియల్‌ జీవితకాల సాఫల్య పురస్కారం (పీఎల్‌ఏ) వరించింది. హ్యూస్టన్‌కు చెందిన ఆయన ప్రవాస భారతీయ సమాజానికి, అమెరికాకు పెద్దఎత్తున చేసిన సేవలకు గుర్తింపుగా ఈ గౌరవం దక్కింది. అమెరికా ప్రభుత్వానికి చెందిన అమెరికా కోర్‌ నేతృత్వంలో జరిగే సేవా కార్యక్రమాల్లో పాల్గొనేవారిలో అత్యుత్తమ అంకితభావం ప్రదర్శించిన వారిని ఏటా పీఎల్‌ఏ పురస్కారం వరిస్తుంది. ఈ సంస్థ కింద 50 లక్షల మంది అమెరికా పౌరులు వివిధ కార్యక్రమాల క్రింద అనేక రంగాల్లో సేవలు అందిస్తున్నారు. ఈ మేరకు గతవారం జరిగిన అవార్డుల ప్రదానోత్సవంలో అమెరికా కోర్‌ సర్టిఫయర్‌ డాక్టర్‌ సోనియా ఆర్‌ వైట్‌ వావిలాలకు పురస్కారాన్ని ప్రదానం చేశారు. ఇందులో శ్వేతసౌధం నుంచి అధ్యక్షుడు బైడెన్‌ సంతకం చేసిన ధ్రువీకరణపత్రం, మెడల్‌ ఉన్నాయి. ఈ కార్యక్రమంలో కృష్ణ వావిలాల సతీమణి ప్రభాత్‌ లక్ష్మీ, కుమార్తెలు, మోనికా, అమండ, నలుగురు మనవలు హాజరయ్యారు. ‘‘అనూహ్యంగా లభించిన ఈ గౌరవం నన్ను కదిలిచింది. హ్యూస్టన్‌లోని భారతీయులకు అందించిన సేవలకు ఇది నిజమైన గుర్తింపు’’ అని పురస్కార ప్రదానోత్సవంలో కృష్ణ పేర్కొన్నారు. 2006లో హ్యూస్టన్‌ వర్సిటీలో ఇండియా స్టడీస్‌ పోగ్రామ్‌ను వావిలాల స్థాపించారు. ఈ ఏడాది ప్రారంభంలో టెక్సాస్‌లోని సదరన్‌ యూనివర్సిటీలోనూ ఇండియా స్టడీస్‌ ప్రోగ్రామ్‌ ప్రారంభించడంలో ఆయనదే ముఖ్య పాత్ర.