తాడుకు బదులు మనిషి.. స్కిప్పింగ్‌లో యూకే రికార్డు..!

లండన్‌: చిత్రవిచిత్రమైన ట్యాలెంట్‌తో ఒళ్లు గగుర్పొడిచే ప్రదర్శన చేస్తుంటారు కొందరు. ట్యూబ్‌లైట్లు మింగడం, మేకులపై నిల్చోవడం వంటివి మనం చూశాం. తాజాగా గిన్నిస్‌ వరల్డ్ రికార్డు షేర్‌ చేసిన వీడియో కూడా అదే తరహాలోనిది. స్కిప్పింగ్ ఆటకు సంబంధించింది. మన తాడాటను భయానకంగా మార్చి.. పోటీ పెట్టింది. తాడుకు బదులుగా మనిషి ఉంచింది. ఇద్దరు వ్యక్తులు ఒక మనిషిని తాడులా గిరిగిరా తిప్పుతుంటే.. ఆ వ్యక్తిని తప్పించుకుంటూ ఇంకొకరు గెంతులు వేశారు. ‘అత్యంత చౌక అయిన స్కిప్పింగ్ రోప్‌ మనిషే’ అంటూ గిన్నిస్‌ వరల్డ్ రికార్డు ట్వీట్‌లో రాసుకొచ్చింది. యూకేకు చెందిన గ్రూప్‌ ఒక నిమిషంలో 57 స్కిప్స్‌ పూర్తి చేసి, వరల్డ్ రికార్డు సొంతం చేసుకుంది.