Obesity: 2035 నాటికి.. ప్రపంచంలో సగానికిపైగా ఊబకాయులే..!

ఇంటర్నెట్‌ డెస్క్‌: తక్షణమే సరైన చర్యలు తీసుకోకపోతే 2035 నాటికి ప్రపంచ జనాభాలో సగానికి పైగా ఊబకాయం, అధిక బరువు (Overweight)తో బాధపడతారని వరల్డ్ ఒబేసిటీ ఫెడరేషన్ (World Obesity Federation) హెచ్చరించింది. అప్పటికి ప్రపంచవ్యాప్తంగా 400 కోట్లకుపైగా ప్రజలు ఈ సమస్య(Obesity)తో ప్రభావితమవుతారని తన తాజా నివేదికలో పేర్కొంది. ఆఫ్రికా, ఆసియాలోని తక్కువ, మధ్య ఆదాయ దేశాల్లో ఈ మేరకు భారీ పెరుగుదల నమోదవుతుందని తెలిపింది. ముఖ్యంగా బాలబాలికల్లో ఈ సమస్య అధికంగా ఉంటుందని అంచనా వేసింది.

‘బాలబాలికల్లో ఊబకాయం రేట్లు 2020 నాటితో పోలిస్తే 2035 నాటికి రెట్టింపు అవుతాయి. ఈ సమస్య వల్ల ప్రపంచ ఆర్థిక వ్యవస్థపై ఏటా 4 ట్రిలియన్‌ డాలర్లకుపైగా ప్రభావం పడుతుంది. ఇది ప్రపంచ జీడీపీలో దాదాపు మూడు శాతానికి సమానం! ప్రపంచవ్యాప్తంగా ఈ సమస్య ఎక్కువగా నమోదవుతుందని అంచనా వేసిన 10 దేశాల్లో తొమ్మిది.. ఆఫ్రికా, ఆసియాలోని తక్కువ లేదా తక్కువ మధ్య ఆదాయ దేశాలే ఉంటాయి’ అని డబ్ల్యూఓఎఫ్‌ తన నివేదికలో పేర్కొంది. బాడీ మాస్ ఇండెక్స్(BMI) ఆధారంగా ఈ నివేదికను రూపొందించినట్లు వెల్లడించింది.

అతిగా ప్రాసెస్ చేసిన ఆహారం, శారీరక శ్రమ తగ్గడం, ఆహార సరఫరా, మార్కెటింగ్‌ విధానాల్లో లోపాలు, బరువు నిర్వహణ, ఆరోగ్య విద్యలో తక్కువ వనరులతో కూడిన సేవలు.. ఈ సమస్య పెరుగుదలకు కారణమవుతాయని నివేదిక తెలిపింది. ఊబకాయంపై ప్రపంచ దేశాలు ఇప్పుడే మేల్కొని.. తగు చర్యలు తీసుకోవాలని, లేనిపక్షంలో భవిష్యత్తులో తీవ్ర పరిణామాలను ఎదుర్కోవాల్సి వస్తుందని ఫెడరేషన్ అధ్యక్షుడు ప్రొ.లూయిస్ బౌర్ వ్యాఖ్యానించారు. నివేదికలోని అంశాలే దీనికి హెచ్చరిక అని తెలిపారు.