Harnaaz Sandhu: కన్నీరు పెట్టుకుని స్టేజ్‌పై జారి పడబోయిన హర్నాజ్‌ సంధు

ఇంటర్నెట్‌డెస్క్‌: ప్రపంచ అందాల పోటీల్లో ప్రతిష్ఠాత్మకంగా భావించే విశ్వ సుందరి పోటీలు అమెరికా లూసియానాలోని న్యూ ఓర్లీన్స్‌ వేదికగా జరిగాయి. దాదాపు 80 దేశాలకు చెందిన భామలు తలపడిన ఈ వేడుకల్లో ముఖ్య అతిథిగా భారతీయ భామ ‘మిస్‌ యూనివర్స్‌ 2021’ హర్నాజ్‌ సంధు (Harnaaz Sandhu) పాల్గొని సందడి చేశారు. అందాల భామల మధ్య జరిగిన పలు పోటీలను ఆమె దగ్గరుండి వీక్షించారు. ఈ ఏడాది విశ్వ సుందరిని ప్రకటించేటప్పుడు స్టేజ్‌పైకి వచ్చిన ఆమె.. మిస్‌ యూనివర్స్‌ హోదాలో చివరిసారిగా ర్యాంప్‌పై వాక్‌ చేశారు. ఆ ఉద్విగ్న క్షణాల్లో ఆమె కన్నీరు పెట్టుకున్నారు. దాంతో స్టేజ్‌పైనే ఆమె జారి పడిపోబోయారు. వెంటనే తమాయించుకున్న ఆమె తిరిగి వాక్‌ కొనసాగించారు. అనంతరం మిస్‌ యూనివర్స్‌ 2022గా గెలుపొందిన అమెరికా భామ ఆర్‌ బానీ గాబ్రియేల్‌కు కిరీటాన్ని అలంకరించారు ఈ భామ.