Putin: ఐసీసీ అరెస్ట్‌ వారెంట్‌.. పుతిన్‌పై ప్రభావమెంత?

మాస్కో: రష్యా(Russia) అధ్యక్షుడు పుతిన్‌(Putin)కు అంతర్జాతీయ న్యాయస్థానం(ICC) అరెస్ట్‌ వారెంట్‌ జారీ చేసిన విషయం తెలిసిందే. ఉక్రెయిన్‌(Ukraine)లోని ఆక్రమిత ప్రాంతాల నుంచి రష్యాకు పిల్లలను చట్టవిరుద్ధంగా తరలించడం వంటి యుద్ధ నేరాల(War Crimes)కు బాధ్యుడిగా పేర్కొంటూ ఈ మేరకు వారెంట్‌ జారీ చేసినట్లు ఐసీసీ స్పష్టం చేసింది. గతేడాది ఫిబ్రవరిలో ఉక్రెయిన్‌పై సైనిక చర్య మొదలు ఈ నేరాలకు పాల్పడినట్లు పేర్కొంది. అయితే.. తాము ఐసీసీని గుర్తించడం లేదని, అందువల్ల దాని చర్యలు రష్యాపై చెల్లుబాటుకావని క్రెమ్లిన్‌(Kremlin) ఇప్పటికే స్పష్టం చేసింది. మరోవైపు.. పుతిన్‌ను అదుపులోకి తీసుకునే అవకాశాలు అసాధ్యమని నివేదికలు చెబుతున్నాయి.

అంతర్జాతీయ సమాజానికి ఆందోళన కలిగించే.. మారణహోమం, మానవతాపై దాడులు, యుద్ధ నేరాల వంటి అత్యంత తీవ్రమైన నేరాలను ఐసీసీ విచారిస్తుందని ‘హ్యూమన్ రైట్స్ వాచ్’ తెలిపింది. కానీ, ఐసీసీకి అనుమానితులను అరెస్టు చేసే అధికారాలు లేవు.  ఐసీసీ ఒప్పందంపై రష్యా సంతకం చేయలేదు. దీంతో అనుమానితులను అప్పగించడం అసాధ్యం. మరోవైపు.. అధ్యక్షుడిగా పుతిన్‌కు స్వదేశంలో సర్వాధికారాలు ఉన్నాయి. 

రష్యాలో ఉన్నంత వరకు.. పుతిన్‌కు అరెస్టు భయం లేదు. ఒకవేళ రష్యాను వీడితే మాత్రం ఆయన్ను అదుపులోకి తీసుకోవచ్చని నివేదికలు చెబుతున్నాయి. ఈ నేపథ్యంలో.. ప్రయాణాల విషయంలో పుతిన్‌ అప్రమత్తమయ్యే అవకాశం ఉంటుంది. అయితే, ఉక్రెయిన్ యుద్ధం నేపథ్యంలో.. పుతిన్‌పై దాదాపు అన్ని పాశ్చాత్య దేశాలు ఆంక్షలు విధించాయి. ఈ నేపథ్యంలో.. ఐసీసీ ఆదేశాలు అమలు చేయాలనుకునే దేశంలో పుతిన్‌ పర్యటించడం కుదరదు. ఇదిలా ఉండగా.. ఈ వ్యవహారంలో రష్యా బాలల హక్కుల కమిషనర్‌ మారియా ల్వోవా బెలోవాపై కూడా ఐసీసీ అరెస్ట్‌ వారెంట్‌ జారీ చేసింది.