Imran Khan: ఏ దేశానికీ వ్యతిరేకం కాదు.. స్వరం మార్చిన ఇమ్రాన్‌!

ఇస్లామాబాద్‌: ఇటీవల అవిశ్వాస తీర్మానంలో ఓడి పదవి కోల్పోయిన పాకిస్థాన్‌ మాజీ ప్రధానమంత్రి ఇమ్రాన్ ఖాన్‌ స్వరం మార్చారు. ఇప్పటి వరకు తనని గద్దె దింపడానికి విదేశీ శక్తులు కుట్రపన్నాయని ఆరోపించిన ఆయన.. తాజాగా ఆయా దేశాల పట్ల మెతక వైఖరి వెలిబుచ్చారు. తనకు భారత్‌ సహా ఏ దేశంపై ద్వేషం లేదని చెప్పుకొచ్చారు.

ఇమ్రాన్‌ఖాన్‌ తన మద్దతుదారులతో కరాచీలో శనివారం భారీ ర్యాలీ నిర్వహించారు. ఒకరకంగా ఆయన దీన్ని బలప్రదర్శనగా చూపించదలిచారు. అక్కడి జనసమూహాన్ని ఉద్దేశిస్తూ ప్రసంగించిన ఇమ్రాన్‌ ‘‘నేను ఏ దేశానికీ వ్యతిరేకం కాదు. భారత్‌, ఐరోపా, అమెరికా.. దేన్నీ నేను ద్వేషించను. నేను ఏ వర్గానికీ వ్యతిరేకం కాదు’’ అని వ్యాఖ్యానించారు. వాస్తవానికి వివిధ వేదికలపై గతంలో ఇమ్రాన్‌ భారత్‌, అమెరికా సహా కొన్ని ఐరోపా దేశాలపై తీవ్ర స్థాయిలో ఆరోపణలు చేశారు.

పదవి కోల్పోవడానికి కొన్ని రోజుల ముందు విదేశీ కుట్రలకు వ్యతిరేకంగా నిరసన ప్రదర్శనలు నిర్వహించాలని ఇమ్రాన్‌ తన పార్టీవర్గాలకు పిలుపునిచ్చారు. తాను రష్యా పర్యటనకు వెళ్లడం ఇష్టంలేని అమెరికాయే ఈ కుట్రను ఎగదోస్తోందంటూ అగ్రరాజ్యంపై ధ్వజమెత్తారు. మరోవైపు ఉక్రెయిన్‌పై దండెత్తిన రష్యాకు వ్యతిరేకంగా ఐరాసలో ఓటేయాని ఐరోపా సమాఖ్య కోరగా.. ‘‘మీరెలా చెబితే అలా వినడానికి మీమేమైనా మీ బానిసలమా?’’ అని విరుచుకుపడ్డారు. ఇక పదవిలో ఉన్న సమయంలో భారత్‌లో ఆయన చిమ్మిన విషం గురించి ప్రత్యేకంగా చెప్పాల్సిన అవసరమే లేదు.

అయితే, తాను పదవికి దూరమవడానికి కొద్దిరోజుల ముందు నుంచీ భారత్‌పై ఇమ్రాన్‌ తన వైఖరికి భిన్నంగా వ్యవహరించారు. పలు సందర్భాల్లో భారత విధానాలపై ప్రశంసలు కురిపించారు. భారత్‌ను ఏ శక్తీ శాసించలేదనీ.. వారు ఆత్మాభిమానం కలవారని కొనియాడారు. అలాగే భారత విదేశాంగ విధానం స్వతంత్రమైనదని తెలిపారు.