Booster shot: బూస్టర్‌ డోసు వేసుకుంటేనే ఆ నగరంలోకి ఎంట్రీ..

అబుదబి: ఒమిక్రాన్‌ కారణంగా ప్రపంచవ్యాప్తంగా కరోనా మరోసారి ఉగ్రరూపం దాల్చింది. పలు దేశాల్లో ప్రతిరోజు లక్షల్లో కేసులు నమోదవుతున్నాయి. దీంతో అనేక దేశాలు మళ్లీ ఆంక్షల బాటపట్టాయి. కొన్ని దేశాలు విదేశీ రాకపోకలు, పర్యటనలపై ఆంక్షలు విధిస్తున్నాయి. ఈ నేపథ్యంలోనే మరో దేశ ప్రభుత్వం కీలక నిర్ణయం తీసుకుంది. యూఏఈ రాజధాని నగరం అబుదాబిలోకి ప్రవేశించాలంటే.. బూస్టర్ డోసు తప్పనిసరి చేసింది అక్కడి అధికార యంత్రాంగం. రెండో డోసు వేసుకున్న ఆరు నెలలకు బూస్టర్​ షాట్‌ తీసుకుంటేనే వ్యాక్సినేషన్​ పూర్తయినట్లు పరిగణించనున్నట్లు వెల్లడించింది. అబుదాబిలో ప్రవేశించేవారు తప్పనిసరిగా వారి టీకా స్థితిని తెలియజేసే గ్రీన్ పాస్​ను చూపించాలనే నిబంధన పెట్టింది.

జపాన్‌లో ఆంక్షల పొడిగింపు..!

ఒమిక్రాన్ వేరియంట్​తో కేసులు భారీగా నమోదవుతున్న నేపథ్యంలో ఇప్పటికే విధించిన ఆంక్షలను మరింత కాలం పొడిగించాలని జపాన్​ సర్కారు యోచిస్తోంది. దీనిపై ఈ వారంలోనే నిర్ణయం తీసుకుని.. శుక్రవారం నుంచి ఆంక్షలను అమలు చేసే అవకాశం ఉందని ప్రభుత్వ ప్రతినిధి ఒకరు తెలిపారు. ఇదే జరిగితే.. ఒకినావా, యమగూచి, హిరోషిమాతో సహా 16 ప్రాంతాల్లో మరో మూడువారాలు పాటు కొవిడ్​ ఆంక్షలు కొనసాగుతాయి.