Iran: మేం ఆమెను చంపలేదు.. చనిపోయింది..!

దిల్లీ: హిజాబ్‌ సరిగా ధరించలేదన్న అభియోగంపై ఇరాన్‌లో పోలీసు కస్టడీలో మాసా అమీని అనే యువతి మృతి చెందడం తీవ్ర ఉద్రిక్తతకు దారితీసింది. దీనిపై ఆ దేశ విదేశాంగ సహాయ మంత్రి స్పందించారు. మేం ఆమెను ‘చంపలేదు..మరణించింది’ అంటూ ఆయన వ్యాఖ్యలు చేశారు. ప్రస్తుతం భారత్‌ పర్యటనలో ఉన్న ఆయన తమ దేశంలో జరుగుతోన్న నిరసనల్లో పాశ్చాత్య దేశాల పాత్రను విమర్శించారు. 

హిజాబ్‌ను సరిగా ధరించలేదన్న అభియోగంపై ఇరాన్‌లో మాసా అమీని అనే యువతిని అక్కడి నైతిక విభాగం పోలీసులు అరెస్టు చేశారు. వారి కస్టడీలో తీవ్రంగా గాయపడ్డ ఆమె.. చికిత్స పొందుతూ సెప్టెంబర్‌ 16న మరణించారు. దీంతో ఆమె సొంత ప్రావిన్సు కుర్దిస్థాన్‌లో సెప్టెంబర్‌ 17న మొదలైన నిరసనలు.. ఇరాన్‌తోపాటు ప్రపంచవ్యాప్తంగా తీవ్రతరమయ్యాయి. ఈ క్రమంలో తన వ్యాఖ్యలతో ఇరాన్ మంత్రి  అలీ బఖేరి పోలీసుల చర్యను సమర్థించారు. ‘మాసాను చంపలేదు. ఆమె మరణించింది. ఇరాన్‌లో నెలకొన్న పరిస్థితిని ఆసరాగా చేసుకొని పాశ్యాత్య మీడియా వ్యవహరించిన తీరును చూశాం. వారి ఆరోపణలు నిరాధారమైనవి’ అని అన్నారు. 

ఇదిలా ఉంటే..ఇరాన్‌లో చెలరేగుతోన్న నిరసనలను అక్కడి భద్రతా బలగాలు కర్కశంగా అణచివేస్తున్నాయి. దాంతో వారం వ్యవధిలో 72 మరణించారని, అందులో 56 మంది కుర్దిష్ ప్రాబల్యం ఉన్న ప్రాంతాల వారని ఓ కథనం పేర్కొంది. కాగా అణచివేతను అంతర్జాతీయ సమాజం ఖండిస్తోంది.