Ukraine Crisis: స్వీడన్‌, ఫిన్లాండ్‌కు యూకే భరోసా..!

ఇంటర్నెట్‌డెస్క్‌: రష్యా నుంచి హెచ్చరికలు ఎదుర్కొంటున్న రెండు దేశాలకు యూకే అండగా నిలిచింది. ఈ విషయాన్ని స్వీడన్‌ పర్యటనలో ఉన్న బ్రిటన్‌ ప్రధాని బోరిస్‌ జాన్సన్‌ వెల్లడించారు. ఆయన స్వీడన్‌ పర్యటనలో భాగంగా ఓ కీలక రక్షణ ఒప్పందం చేసుకొన్నారు. ఈ మేరకు స్వీడన్‌ ప్రధాని మాగ్డలీనా అండర్సన్‌, బ్రిటన్‌ ప్రధాని బోరిస్‌ జాన్సన్‌లు ఒప్పంద పత్రాలపై సంతకాలు చేశారు. ఈ ఒప్పందం ప్రకారం స్వీడన్‌ సంక్షోభ సమయాన్ని ఎదుర్కొంటున్నప్పుడు బ్రిటన్‌ సాయానికి వస్తుందని పేర్కొన్నారు. 

‘‘మేము నిస్సందేహంగా, నమ్మకంగా స్వీడన్‌, ఫిన్లాండ్‌ దేశాలకు మద్దతుగా నిలుస్తాము. తాజాగా చేసుకొంటున్న ఈ ఒప్పందాలు అంతులేని నమ్మకానికి చిహ్నంగా ఉంటాయి’’ అని బోరిస్‌ జాన్సన్‌ ఓ ప్రకటన విడుదల చేశారు. 

జాన్సన్‌ మరో 24 గంటల్లో ఫిన్లాండ్‌ను సందర్శించనున్నారు. అక్కడ కూడా ఇటువంటి ఒప్పందాన్నే ఆ దేశాధినేత నినిస్టోతో చేసుకోనున్నారు. ఇప్పటికే ఈ దేశాల సమీపంలో బ్రిటన్‌కు చెందిన రాయల్‌ ఎయిర్‌ఫోర్స్‌, బ్రిటిష్‌ ఆర్మీ, రాయల్‌ నేవీ దళాలు ఇప్పటికే భారీ ఎత్తున మోహరించింది.