అక్రమ బంగారం కోసం వెళ్లి.. 12 మంది అనంతలోకాలకు...

మెడాన్ (ఇండోనేషియా): అక్రమ బంగారు గనుల్లో తవ్వకాల కోసం వెళ్లి 12 మంది చనిపోయారు. కొండచరియలు విరిగిపడడంతో వీరంతా మృత్యువాతపడ్డారు. మరో ఇద్దరికి తీవ్ర గాయాలయ్యాయి. ఉత్తర సుమత్రాలోని మాండయిలింగ్ నాటల్ జిల్లాలోని ఓ గ్రామంలో బంగారు గని ఉంది. ఇక్కడ  తరచు బంగారం తవ్వకాలు జరుగుతుంటాయి. అయితే బంగారం తవ్విన అనంతరం అక్కడ ఇంకా ఏమైనా బంగారం ముక్కలు దొరుకుతాయేమోనని ఆ చుట్టు పక్కల గ్రామాల్లోని ప్రజలు వెళ్తుంటారు. గురువారం కూడా కొందరు మహిళలు అలాగే వెళ్లారు. ఆదే సమయంలో కొండచరియలు విరిగిపడడంతో 12 మంది అక్కడికక్కడే మృతి చెందారు. సమాచారం అందుకున్నఅధికారులు సహాయక చర్యలు చేపట్టారు.