Ukraine Crisis: చీకటిలో లివివ్‌.. పవర్‌ ప్లాంట్‌ ధ్వంసం..!

ఇంటర్నెట్‌డెస్క్‌: ఉక్రెయిన్‌కు పశ్చిమ దేశాల ఆయుధ సరఫరాలో కీలక మజిలీ అయిన లివివ్‌పై రష్యా విరుచుకుపడింది. ఈ నగరానికి విద్యుత్తు సరఫరా చేసే ప్లాంట్‌పై మూడు రష్యా క్షిపణులు పడ్డాయి. దీంతో అక్కడ విద్యుత్తు, నీటి సరఫరా నిలిచిపోయింది. దాదాపు వారం తర్వాత రష్యా దళాలు లివివ్‌పై చేసిన దాడి ఇది. రాత్రి 8.30 సమయంలో పలు దిశల నుంచి క్షిపణులు నగరంపైకి దూసుకొచ్చాయి. దాదాపు గంటన్నరసేపు ఎయిర్‌ రైడ్‌ సైరన్లు మోగాయి. గతంలో రష్యా ఈ నగరంలోని రైలు నెట్‌వర్క్‌పై దాడులు చేసింది.

ఈ దాడులపై మేయర్‌ ఆండ్రీ సడోవి స్పందిస్తూ.. ‘‘మూడు విద్యుత్తు స్టేషన్లు నిలిచిపోయాయి. రెండు పంపు స్టేషన్లకు కూడా విద్యుత్తు సరఫరా నిలిచిపోయింది. ఫలితంగా నగరవాసులకు తాగు నీరు అందడంలేదు’’ అని తెలిపారు.

ఉక్రెయిన్‌లోని లివివ్‌ నగరం పోలాండ్‌కు అత్యంత సమీపంలో ఉంటుంది. ఈ నగరం మీదుగానే ఐరోపా సమాఖ్య, అమెరికా నేతలు కీవ్‌ను సందర్శించారు. దీంతోపాటు ఉక్రెయిన్‌ దళాలకు పశ్చిమదేశాల ఆయుధ సరఫరాలో ఇది కీలక కేంద్రం. వివిధ దేశాల నుంచి ఉక్రెయిన్‌కు మద్దుతుగా పోరాడేందుకు వస్తున్న వారికి కూడా ఇక్కడ శిక్షణ ఇస్తున్నట్లు రష్యా ఆరోపిస్తోంది.