Lion: కాపలాదారుడ్ని చంపి బోనులో నుంచి తప్పించుకుపోయిన సింహాలు

తెహ్రాన్‌: ఇరాన్‌లోని ఓ జంతు ప్రదర్శనశాలలో భయానక ఘటన చోటుచేసుకుంది. కాపలాదారుడిపై దాడిచేసి చంపిన ఓ సింహం మరో సింహంతో కలిపి పారిపోయింది. మర్కాజీ ప్రావిన్స్‌ అరక్‌లోని జూలో చాలా కాలంలో ఓ సింహం జీవిస్తోంది. అయితే ఎలాగోలా ఆ బోను తలుపు తెరవగలిగిన సింహం.. ఆహారాన్ని అందించేందుకు వెళ్లిన కాపలాదారుడి(40)పై దాడికి పాల్పడింది. తీవ్ర గాయాలపాలైన అతడు అక్కడికక్కడే మృతిచెందాడు. ఈ దాడి అనంతరం ఆ సింహం సహచర మృగరాజుతో కలిసి బోనులోనుంచి తప్పించుకుపోయింది.

వెంటనే అప్రమత్తమైన జూ సిబ్బంది విషయాన్ని పైఅధికారులకు తెలియజేశారు. దీంతో ఆ జూను భద్రతా బలగాలు ఆధీనంలోకి తీసుకున్నట్లు ప్రావిన్స్‌ గవర్నర్‌ ఆమిర్‌ హాది మీడియాకు వెల్లడించారు. పారిపోయిన ఆ సింహాలను తిరిగి పట్టుకున్నట్లు తెలిపారు.