Viral Video: బోనులోంచి తప్పించుకున్న సింహాలు.. ప్రాణ భయంతో జనం పరుగులు!

బీజింగ్‌: బోనులో బంధించిన సింహాలను దగ్గరి నుంచి చూడాలంటేనే వణుకుతాం. అలాంటిది  ఎన్‌క్లోజర్‌ నుంచి తప్పించుకున్న ఆ మృగాలు ఒక్కసారిగా మనపైకి దూసుకొస్తే..! గుండె ఆగినంత పని అవుతుంది కదా!  సరిగ్గా ఇలాంటి ఘటనే చైనాలోని హెనాన్‌ ప్రావిన్స్‌ లుయోయాంగ్‌ ప్రాంతంలో చోటుచేసుకుంది.  సర్కస్‌లో విన్యాసాలను వీక్షిస్తూ ఆనందిస్తున్న జనంపైకి ఎన్‌క్లోజర్‌ నుంచి తప్పించుకున్న రెండు సింహాలు ఒక్కసారిగా దూసుకురావడంతో వారంతా ప్రాణాలను అరచేతిలో పట్టుకొని భయంతో బయటకు పరుగులు పెట్టారు. ఒళ్లుగగుర్పాటుకు గురిచేసే ఈ ఘటనకు సంబంధించిన దృశ్యాలు సామాజిక మాధ్యమాల్లో వైరల్‌గా మారాయి. 

ఈ సర్కస్‌ ఏర్పాటు చేసిన ఎన్‌క్లోజర్‌లో నిర్వాహకులు సింహాలతో విన్యాసాలు చేసేందుకు ప్రయత్నించారు. ఈక్రమంలో ఓ రింగ్‌ లోంచి దూకేందుకు సింహాలు మొరాయించడంతో వాటితో బలవంతంగా విన్యాసాలు చేయించేందుకు ట్రైనర్లు ప్రయత్నించారు. ఆ సమయంలో ఎన్‌క్లోజర్‌లో సరిగా లాక్‌ చేయని డోర్‌ నుంచి రెండు సింహాలూ ఒక్కసారిగా బయటకు దూకాయి.

దీంతో గ్యాలరీల్లో కూర్చొని వీక్షిస్తున్న జనానికి  ఏం చేయాలో తెలియక భయంతో కేకలు వేస్తూ బయటకు పరుగులు పెట్టారు. దీంతో ఆ ప్రాంతమంతా దద్దరిల్లింది. అప్రమత్తమైన నిర్వాహకులు ఆ సింహాలను త్వరగా పట్టుకొని తిరిగి బోనులో బంధించారు. ఈ ఘటనతో సర్కస్‌ను నిలిపివేయాలని అధికారులు ఆదేశించారు. ఆ సింహాలు ఎలా తప్పించుకున్నాయనేది  మాత్రం సర్కస్‌ నిర్వాహకులు వెల్లడించలేదు. ఈ ఘటనపై దర్యాప్తు చేపట్టారు.  ఈ దృశ్యాలు సామాజిక మాధ్యమాల్లో వైరల్‌ కావడంతో నిర్వాహకులపై జంతుప్రేమికులు, నెటిజన్లు ఆగ్రహం వ్యక్తంచేస్తూ కామెంట్లు పెడుతున్నారు.