బద్ధకస్థులకు ఆపద్బాంధవుడు ఫ్రెడ్డీ.. క్యూల్లో నిలబడి రోజుకు రూ.16 వేలు సంపాదన

లండన్‌: గంటల తరబడి క్యూలో నిలబడాలంటే చాలామందికి చిరాకు. ఒక్కోసారి ఓపిక నశించి వచ్చిన పని పూర్తి చేసుకోకుండానే వెనుదిరుగుతుంటారు. ఇలా బద్ధకించే ప్రబుద్ధులకు ఆపద్బాంధవుడిలా బ్రిటన్‌కు చెందిన ఫ్రెడ్డీ బెకిట్‌ (31) క్యూల్లో నిల్చొని రోజుకు రూ.16 వేలు సంపాదిస్తున్నాడు. గంటకు 20 యూరోలు (దాదాపు రూ.2 వేలు) ఛార్జ్‌ చేసే ఫ్రెడ్డీ రోజూ తన క్లయింట్స్‌ కోసం 8 గంటలు క్యూలో నిల్చుంటాడు. బ్రిటన్‌లో తరచూ ఈవెంట్లు జరుగుతాయి. వీటి టికెట్లు కావాలంటే కనీసం గంటైనా క్యూలో నిల్చోవాలి. శీతాకాలంలో ఎక్కువమంది తనను ఈ పని కోసం సంప్రదిస్తుంటారని ఫ్రెడ్డీ తెలిపాడు. తక్కువ నైపుణ్యం అవసరమయ్యే ఈ పనితో బాగానే సంపాదిస్తున్నప్పటికీ, ఫుల్‌టైం జాబ్‌ వేరే చూసుకుంటానని చెప్పాడు. నిలబడటంలో తన నైపుణ్యాల గురించి ఇతను టాస్క్‌ర్యాబిట్‌ (ఆన్‌లైన్‌ వేదిక)లో ప్రకటన కూడా ఇచ్చాడు.