King Charles: అప్పుడు క్వీన్‌ ఎలిజబెత్‌కు.. ఇప్పుడు కింగ్‌ ఛార్లెస్‌కి.. వెన్నంటే ఉంటూ..!

ఇంటర్నెట్‌డెస్క్‌: దాదాపు ఏడు దశాబ్దాల తర్వాత బ్రిటన్‌లో (Britain) పట్టాభిషేక కార్యక్రమం అంగరంగ వైభవంగా జరిగింది. కింగ్‌ ఛార్లెస్‌-3 బ్రిటన్‌తో పాటు మరో 14 రాజ్యాలకు రాజుగా పట్టాభిషిక్తుడయ్యారు. క్వీన్‌ ఎలిజబెత్‌-2 గత ఏడాది సెప్టెంబరులో కన్నుమూసిన తర్వాత వేలాది మంది ప్రజలు, విదేశాలకు చెందిన అతిథుల నడుమ ఈ పట్టాభిషేకం కనులవిందుగా సాగింది. ఈ సందర్భంగా కింగ్‌ ఛార్లెస్‌ బాడీగార్డుపై మరోసారి ఇంటర్నెట్‌లో చర్చ మొదలైంది. గత ఏడాది కాలంగా ఛార్లెస్‌-3 ఎక్కడికి వెళ్లినా.. గుబురు మీసాలతో దృఢమైన శరీరం కలిగిన ఓ వ్యక్తి ఆయన వెన్నంటే ఉంటూ రక్షణ కల్పిస్తున్నారు.

గతంలో తన తల్లి క్వీన్‌ ఎలిజబెత్‌-2కి రక్షణ కల్పించిన సెక్యూరిటీ బృందాన్నే ప్రస్తుతం ఛార్లెస్‌-3 కూడా కొనసాగిస్తున్నారు. ఎలిజబెత్‌-2 అంత్యక్రియల సమయంలోనూ ఈ బాడీగార్డు అందరి దృష్టినీ ఆకర్షించారు. అంతేకాకుండా, గత ఏడాది కాలంలో కింగ్‌ ఛార్లెస్‌-3 పాల్గొన్న దాదాపు అన్ని కార్యక్రమాల్లోనూ వెన్నంటే ఉంటూ అనుక్షణం రక్షణగా నిలుస్తున్నారు. ఎవరైనా రాజు ఫొటోలను తీయాలనుకుంటే.. వెంటనే ఫోన్‌ను కిందకి దించాలని చెబుతూనే.. ఆయన్ను నేరుగా చూసి సంతోషించాలంటూ మృదువుగా చెప్పేవారు. ఒకసారి ఓ మహిళ కింగ్‌ ఛార్లెస్‌-3 వీడియోను తీస్తుండగా ఆమె చేతిలోని ఫోన్‌ను లాక్కొని, వీడియో తీయొద్దని వారించడం సామాజిక మాధ్యమాల్లోనూ వైరల్‌ అయ్యింది. 

అందరూ ఆ బాడీ గార్డును కింగ్స్‌మ్యాన్ సినిమాలోని బ్రిటన్‌-ఇటాలియన్‌ నటుడు కొలిన్‌ ఫిర్త్‌తో పోల్చుతున్నారు. అతడి నడుము వద్ద ఓ గొడుగులాంటి వస్తువు ఒకటి ఉంటుంది. అత్యవసర పరిస్థితుల్లో వినియోగించేందుకు అందులో తుపాకీ ఉంటుందని కొందరు చెబుతుంటారు. మరోవైపు ఆ బాడీగార్డు సీక్రెట్‌ సర్వీసు నుంచి వచ్చిన అధికారి అని కొందరు భావిస్తుండగా.. కొందరు మాత్రం కింగ్‌ ఛార్లెస్‌ కుటుంబం నియమించుకున్న ప్రైవేటు భద్రత అధికారి అని అంటారు. అతడు ఎవరైనప్పటికీ.. గతంలో క్వీన్‌ ఎలిజబెత్‌-2, ఆ తర్వాత కింగ్‌ ఛార్లెస్‌-3 కూడా ఆయన్ని రక్షణ అధికారిగా నియమించుకోవడం రాజకుటుంబీకులకు అతడిపై ఉన్న నమ్మకానికి అద్దం పడుతోంది.