Mumbai terror attacks: 2008 ఉగ్రదాడి గాయం గుర్తులు ఇంకా మానిపోలేదు: అమెరికా

ఇంటర్నెట్‌డెస్క్‌: ముంబయి(Mumbai)లో 2008లో జరిగిన ఉగ్రదాడు(Mumbai terror attacks)ల్లో గాయాలను భారత్‌, అమెరికా ఇంకా మర్చిపోలేదని అమెరికా పేర్కొంది. విదేశాంగశాఖ ప్రతినిధి నెడ్‌ ప్రైస్‌ రోజువారీ విలేకర్ల సమావేశంలో మాట్లాడుతూ ఈ వ్యాఖ్యలు చేశారు. రోజువారీ విలేకర్ల సమావేశంలో ఒకరు పాక్‌కు సాయంపై నెడ్‌ప్రైస్‌ను ప్రశ్నించారు. ‘‘2008 ఉగ్రదాడులు (Mumbai terror attacks)జరిగి 14ఏళ్లు అయింది.. దీనిలో ఆరుగురు అమెరికా పౌరులు ప్రాణాలు కోల్పోయారు. . ఇటీవల ఫారెన్‌ రిలేషన్స్‌ కమిటీ ఛైర్మన్‌ మైఖేల్‌ మెక్‌కౌల్‌ ఇటీవల యూఎస్‌ఎయిడ్‌ నిర్వాహకురాలు సమంతా పవార్‌కు లేఖ రాశారు. హెల్పింగ్‌ హ్యాండ్‌ అండ్‌ డెవలప్‌మెంట్‌ ఫౌండేషన్‌ (హెచ్‌హెచ్‌ఆర్‌డీ)కి నిధులు అందించవద్దని కోరారు. ఈ సంస్థకు లష్కరే తొయిబా సహా పాక్‌ ఐఎస్‌ఐతో సంబంధాలున్న ఉగ్ర గ్రూపులకు సంబంధం ఉందని పేర్కొన్నారు. ఆ లేఖ గురించి.. ఉగ్రదాడిలో మరణించిన అమెరికా పౌరుల విషయంలో మీరు ఏం చెబుతారు’’ అని విలేకరి ప్రశ్నించారు. 

‘‘2008 ముంబయిలోని ఉగ్రదాడుల(Mumbai terror attacks) గాయం తాలుకా గుర్తులు భారత్‌, అమెరికాల్లో ఇంకా మానిపోలేదు. హోటల్‌పై దాడి, రక్తపాతం.. ఆ నాటి భయంకర చిత్రాలు ఇంకా గుర్తుకు వస్తుంటాయి. అందుకే అమెరికా ఆ దాడికి కారణమైన వ్యక్తులే కాదు.. వీరి వెనుక ఉగ్ర సంస్థలలను ఇప్పటికీ బాధ్యత వహించేలా ఒత్తిడి చేస్తుంది’’ అని పేర్కొన్నారు. నాటి ఉగ్రదాడిలో మొత్తం 166 మంది అమాయకులు ప్రాణాలు కోల్పోగా.. 300 మంది గాయపడ్డారు. ఈ దాడిలో మొత్తం పది మంది పాకిస్థాన్‌ ఉగ్రవాదులు పాల్గొన్నారు. వీరిలో తొమ్మిది మందిని మట్టుపెట్టగా.. కసబ్‌ అనే ఉగ్రవాదిని సజీవంగా పట్టుకొన్నారు. ఆ తర్వాత 2012లో అతడికి ఉరిశిక్షను అమలు చేశారు.