North Korea: రోజుల వ్యవధిలోనే 10 లక్షల మందికి జర్వం.. అవి కోవిడ్‌ కేసులేనా?

ఇంటర్నెట్‌డెస్క్‌: ఉత్తరకొరియాలో కరోనా విజృంభిస్తోందా?తొలికేసు బయటపడిన రోజుల వ్యవధిలోనే లక్షల సంఖ్యలో ప్రజలు జ్వరాలు బారిన పడటం ఇందుకు బలాన్ని చేకూరుస్తోంది. భారీగా టెస్టులు చేసే అవకాశం ఉత్తరకొరియాకు లేకపోవడంతో.. లక్షణాల ఆధారంగానే కొవిడ్‌గా భావిస్తున్నారు. ఈ విషయాన్ని అక్కడి ప్రభుత్వ మీడియానే వెల్లడించింది. దాదాపు 10 లక్షల మందికి పైగా జ్వరంతో బాధపడుతున్నారని మీడియా పేర్కొంది. ఇప్పటి వరకు 50 మంది ప్రాణాలు కోల్పోయారు.

ఉత్తరకొరియాలో కొవిడ్‌ పెను ప్రభావం చూపే అవకాశం ఉంది. అక్కడ సరైన ఆరోగ్య వ్యవస్థ లేకపోవడం, వ్యాక్సినేషన్లు వేయకపోవడంతో ప్రజల ప్రాణాలు ప్రమాదంలో పడ్డాయి. దీంతో జాతీయ స్థాయిలో లాక్‌డౌన్‌ విధించారు. ఇటీవల ఉ.కొరియా అధినేత కిమ్‌ ఎమర్జెన్సీ పొలిట్‌ బ్యూరో మీటింగ్‌ నిర్వహించారు. దీనిలో ఔషధ సరఫరాలో అధికారులు విఫలమయ్యారని విమర్శించారు. దీంతో ఉ.కొరియా సైన్యంలో మెడికల్‌ కోర్‌ను రంగంలోకి దింపారు. ప్యాంగ్యాంగ్‌ నగరానికి ఔషధ సరఫరాలో ఎలాంటి ఇబ్బందులు లేకుండా చూడాలని ఆదేశించారు. ఉత్తర కొరియా కోరితే.. ఎంత సాయమైనా పంపేందుకు సిద్ధమే అని ఇటీవల దక్షిణ కొరియా ప్రకటించింది.

గత వారమే ఉ.కొరియాలో తొలి కొవిడ్‌ కేసు నిర్ధారించారు. అప్పటికే వైరస్ వ్యాప్తి జరిగిపోయి ఉంటుందని వైద్యులు అంచనావేశారు. ఈ నేపథ్యంలో ఆ దేశ అధినేత కిమ్ వైరస్‌ వ్యాప్తిని అడ్డుకొనేందుకు ఎమర్జెన్సీ విధించారు. గతేడాది పలు దేశాలు ఉత్తరకొరియాకు ఆస్ట్రాజెనెకా, చైనా తయారీ టీకాలను ఆఫర్‌ చేశాయి. కానీ, ఉ.కొరియా మాత్రం లాక్‌ డౌన్‌, సరిహద్దుల మూసివేతతోనే వైరస్‌ను అదుపు చేస్తామని పేర్కొంది.