Giraffe vs Lioness: ‘అమ్మ ప్రేమ’ ముందు.. తలవంచిన సింహం

ఇంటర్నెట్‌డెస్క్‌: అమ్మప్రేమ వెల కట్టలేనిది. ఎన్ని కష్టాల్లో ఉన్నా.. మన దగ్గర అమ్మ ఉంటే ఎంతో ధైర్యం. బిడ్డ బాగోగులను, అభ్యున్నతిని కోరుకునే వారిలో అమ్మ తరువాతే ఎవరైనా. ఆపద కాలంలో తన ప్రాణాలను సైతం ఫణంగా పెట్టయినా సరే.. తల్లి తన పిల్లల్ని కాపాడుకోవాలని చూస్తుంది.  ఇది కేవలం మనుషులకే కాదు.. జంతువులకూ వర్తిస్తుందని నిరూపించిందో జిరాఫీ. సింహంతో పోరాడి మరీ తన బిడ్డను కాపాడుకుంది. ఎక్కడ జరిగిందో తెలియదుగానీ.. మైదాన ప్రాంతంలో ఓ జిరాఫీ పిల్ల కూర్చొని ఉంది. అది గమనించిన ఓ ఆడ సింహం నక్కి నక్కి ఒక్క ఉదుటున దూకి దాని మెడ పట్టుకుంటుంది.

తప్పించుకోవడానికి ఆ జిరాఫీ పిల్ల ఎంత ప్రయత్నించినా ఉపయోగం లేకపోయింది. అక్కడికి దగ్గర్లోనే ఉన్న జిరాఫీ తల్లి.. ఆపదలో ఉన్న తన పిల్లను చూసి పరుగెత్తుకుంటూ సింహంపై దాడి చేసింది. సింహం తనకంటే బలవంతమైందని తెలిసి కూడా.. తన బిడ్డను కాపాడేందుకు సాహసించింది. తల్లి జిరాఫీ రాకను గమనించిన సింహం అక్కడి నుంచి పారిపోయింది. వెంటనే మళ్లీ వెనక్కి వచ్చిన జిరాఫీ తన పిల్లకు భరోసాగా అక్కడే నిలబడింది. ఈ వీడియోను యానిమల్‌ వరల్డ్స్‌ 11 ఇన్‌స్టాగ్రామ్‌ ఖాతాలో పోస్టు చేయడంతో వైరల్‌గా మారింది. ప్రాణాలకు తెగించి తల్లి జిరాఫీ చేసిన పోరాట తెగువను నెటిజన్లు అభినందిస్తున్నారు.