Updated : 09 Apr 2022 10:32 IST

Ukraine crisis: కదనరంగంలో వీర నారి.. ఉక్రెయిన్‌ సేనలకు అండగా ‘చార్కోల్‌’

కీవ్‌: రెండో ప్రపంచ యుద్ధంలో ఉక్రెయిన్‌ సైన్యానికే హీరోగా నిలిచింది ‘లేడీ డెత్‌’. కాగా నేడు ఆమె స్థానాన్ని భర్తీ చేస్తోంది ‘చార్కోల్‌’. రష్యా సేనలకు ధీటుగా ఎదుర్కొంటూ.. వీరోచితంగా పోరాడుతున్న యోధురాలు చార్కోల్‌. ముఖం సగభాగం కవర్‌ చేసి ఉన్న ఈ లేడీ స్నైపర్‌కు సంబంధించిన ఫొటోలను ఉక్రెయిన్‌ సైన్యం తాజాగా సోషల్‌ మీడియాలో పంచుకుంది. ఆమె పేరును వెల్లడించకుండా ‘చార్కోల్‌’గా అభివర్ణిస్తూ.. రెండో ప్రపంచ యుద్ధంలో వీరోచితంగా పోరాడిన ‘లేడీ డెత్‌’తో పోల్చింది.

ఉక్రెయిన్‌ సైన్యం వెల్లడించిన సమాచారం ప్రకారం.. తన సోదరుడి కోరిక మేరకు 2017లో మెరైన్‌ సైన్యంలో చేరారు చార్కోల్‌. రష్యా మద్దతుతో సాగే వేర్పాటువాదులకు వ్యతిరేకంగా.. దేశం తూర్పు ప్రాంతంలో విశేష సేవలందించారు. అనేకమంది శత్రువులను మట్టుబెట్టారు. ఈ ఏడాది జనవరి నాటికి ఒప్పందం ముగియడంతో విధుల నుంచి తప్పుకొన్నారు. అయితే సైనిక చర్య పేరుతో ఫిబ్రవరి 24న ఉక్రెయిన్‌పై రష్యా దాడులను ప్రారంభించడంతో వెంటనే తిరిగి విధుల్లో చేరిన ఈ స్నైపర్ శత్రు సైన్యంపై వీరోచితంగా పోరాడుతున్నారు. రష్యన్‌ సైనికులను ఉద్దేశించి మాట్లాడుతూ.. వారు రాక్షసులు అని, వారందరినీ మట్టుబెట్టడమే తన కర్తవ్యంగా పేర్కొన్నట్లు ‘కీవ్‌ ఇండిపెండెంట్‌’ వార్తాసంస్థ తెలిపింది.

గతంలో సోవియట్‌ రెడ్‌ ఆర్మీ తరఫున పోరాడి శత్రు సైన్యానికి సింహ స్వప్నంలా నిలిచిన స్నైపర్‌ లేడీ డెత్‌తో చార్కోల్‌ను పోల్చడం విశేషం. లేడీ డెత్‌ అసలు పేరు లియుడ్మిలా పావ్లిచెంకో. రెండో ప్రపంచ యుద్ధంలో ఆమె 300 మందికి పైగా జర్మన్ సైనికులను హతమార్చినట్లు ఉక్రెయిన్‌ సైన్యం వెల్లడించింది. ఒడెసా, సెవాస్టోపోల్‌ను నాజీల బారినుంచి కాపాడే పోరాటంలో గాయపడింది. ఆ తర్వాత యుద్ధంలో  అమెరికాకు కూడా మద్దతుగా నిలిచింది. లేడీ డెత్‌ సేవలకు గానూ యూఎస్‌ఎస్‌ఆర్‌ అత్యున్నత పురస్కారం ‘ది హీరో ఆఫ్‌ సోవియట్‌ యూనియన్‌ అవార్డ్‌’తో సత్కరించింది.

Read latest World News and Telugu News

Follow us on Facebook, Twitter, Instagram, Koo, ShareChat, and Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts