NASA: 2040 నాటికి చంద్రుడిపై 3డీ ఇళ్ల నిర్మాణం.. ప్రణాళికలు సిద్ధం చేస్తున్న నాసా

ఇంటర్నెట్‌ డెస్క్‌: భారత్‌ సహా పలు దేశాలు చంద్రుడి గుట్టు విప్పేందుకు ఎంతో కాలంగా పరిశోధనలు సాగిస్తున్నాయి. చంద్రుడిపై మానవాళి జీవనానికి అనువైన వాతావరణం ఉందా? అక్కడి పరిస్థితులు ఎలా ఉంటాయనే దానిపై పరిశోధనలు జరుగుతున్నాయి. ఈ క్రమంలోనే 2040 నాటికి చంద్రుడిపై మనుషుల కోసం నాసా ఇళ్ల నిర్మాణం చేపట్టనున్నట్లు ‘న్యూయార్క్‌టైమ్స్‌’ ఓ కథనంలో పేర్కొంది. చంద్రుడి ఉపరితలంపై పరిశోధనల కోసం వ్యోమగాములు అధిక సమయం అక్కడే ఉండేందుకు ఈ నిర్మాణాలు తోడ్పడతాయని నాసా భావిస్తోంది. 3డీ ప్రింటర్‌ సాయంతో రాక్‌ చిప్స్, ఖనిజాలను ఉపయోగించి ఇళ్ల నిర్మాణం చేపట్టనుంది.

‘‘కొన్నిసార్లు ఇది కలలా అనిపించవచ్చు. కానీ, ప్రైవేటు కంపెనీలు, యూనివర్సిటీలను భాగస్వాములను చేస్తూ ఆధునిక సాంకేతికత సాయంతో ఈ నిర్మాణం చేపట్టాలని భావిస్తున్నాం. 2024 ఫిబ్రవరిలో 3డీ ప్రింటర్‌ను చంద్రుడి ఉపరితలంపైకి పంపాలని నిర్ణయించాం. ప్రస్తుతం ప్రింటర్‌ పనితీరును పరీక్షిస్తున్నాం’’ అని నాసా సాంకేతిక విభాగం డైరెక్టర్‌ నిక్కీ వెర్కీసర్‌ తెలిపారు. 

నిజ్జర్‌ హత్యపై ఆరోపణలు.. కెనడాతో టచ్‌లోనే ఉన్నాం: అమెరికా

ఆర్టెమిస్‌-1 ప్రయోగం తర్వాత నాసా ఆర్టెమిస్‌-2, ఆర్టెమిస్‌-3 ప్రయోగాలకు ప్రణాళికలు సిద్ధం చేసింది. ఇందులో భాగంగా 2024లో ఆర్టెమిస్‌-2 యాత్రను నిర్వహించనుంది. అందులో నలుగురు వ్యోమగాములు ఉంటారు. వారు చంద్రుడిపై దిగకుండా, ఉపరితలానికి 9వేల కిలోమీటర్ల దూరంలోని కక్ష్యలో చంద్రుడిని చుట్టి వస్తారు. ఆ యాత్ర విజయవంతమైతే విశ్వంలో మనిషి ప్రయాణించిన అత్యంత ఎక్కువ దూరం అదే అవుతుంది. 2025లో ఆర్టెమిస్‌-3 జరుగుతుంది. ఆ యాత్రలో ఒక మహిళ సహా నలుగురు వ్యోమగాములు చంద్రుడి దక్షిణ ధ్రువంపై కాలుమోపుతారని నాసా తెలిపింది.